قازاق قىزى رامازان ايىندا افريكاداعى 280 وتباسىن تاماقتاندىردى - فوتو

  استانا. قازاقپارات - پاۆلودار تۇرعىنى توعجان ىنتىقبايەۆا كۇيەۋىمەن جانە دوستارىمەن بىرگە افريكاداعى مۇقتاج بالالارعا كومەكتەسۋدى ۇيعارعان.

ولار اقشا جيناپ، ونداعى 280 وتباسىن تاماقتاندىردى، دەپ حابارلايدى Stan.kz.

توعجان ىنتىقبايەۆا Instagram جەلىسىندەگى پاراقشاسىندا افريكاداعى مۇقتاج بالالارعا كومەكتەسۋ ءۇشىن بارعان ساپارىنان سۋرتتەر جاريالادى.

توعجاننىڭ ايتۋىنشا، ول كۇيەۋى جانە دوستارىمەن بىرگە ارنايى QR- كودى بار كارتالار ساتىپ، سول ارقىلى 2,5 ميلليون تەڭگە جيناعان. ال جينالعان اقشاعا ءبىر توننا ۇن، 750 كەلى كۇرىش، 750 كەلى قانت، 250 كەلى تۇز، سونىمەن قاتار كوفە، قىزانىق پەن ماكارون ساتىپ الىپتى. بويجەتكەن جالپى سانى 280 پاكەت جيناعان.

توعجاننىڭ سوزىنشە، افريكادا ءومىر سۇرۋگە دۇرىس جاعداي جاسالماعان.

 
«ءبارى يگى ءىس جاساۋعا دەگەن كىشكەنتاي عانا نيەتتەن باستالعان ەدى. الايدا قازاقستاندىقتاردىڭ مەيىرىمدىلىگى بىزگە 2,5 ميلليون تەڭگە جيناۋعا كومەكتەستى. بۇگىن ءبىز اۋىلدا 10 پاكەتتى ۇلەستىردىك. ونى تاعى ەكىگە بولدىك. سەبەبى اۋىل تۇرعىندارى ەككەن ەگىندەرىن تالعاجاۋ ەتەتىندىكتەن، بىزگە وسىلاي كەڭەس بەردى» ، - دەيدى توعجان.

سونداي- اق، توعجان ىنتىقبايەۆا قازاقستان مەن افريكاداعى كەيبىر زاتتىڭ باعاسىن سالىستىردى. ەلىمىزدە 1 ليتر شىرىننىڭ باعاسى 400-500 تەڭگە بولسا، افريكادا 1500-2000 تەڭگەگە ساتىلادى. ال قازاقستاندا جورگەكتىڭ كىشكەنتاي قاپتاماسى 1000-1200 تەڭگەگە ساتىلسا، افريكادا باعاسى  10000- 000 12تەڭگەنى قۇرايدى.

سونىمەن قاتار توعجان اقشا جيناۋعا كومەكتەسكەن قازاقستاندىقتارعا العىس ءبىلدىردى. ونىڭ سوزىنشە، ەندىگى افريكاداعى 280 وتباسى ءبىر اي كولەمىندە توق جۇرەتىن بولادى.