الماتىدا 2800 قاتە جارناما ءماتىنى تەكسەرىلۋگە جىبەرىلدى - فوتو
وسى بيلبوردتاعى قاتەلەرگە كىم جاۋاپتى جانە قانداي جازا قولداناتىندىعى تۋراسىندا Almaty.tv ءتىلشىسى انىقتاعان بولاتىن.
«الماتى قالاسىنىڭ وزىندە 100 جۋىق جارناما اگەنتتىكتەرى بار. ولاردىڭ ىشىندەگى تەك % 50-60 ى عانا زاڭدى تۇردە تىركەلگەن. ءبىز وسى جىلدىڭ 2 - ساۋىرىنەن باستاپ موراتوري جاريالادىق. موراتوري كەزىندە كەلىپ تۇسكەن وتىنىشتەر بويىنشا ادىستەمەلىك كومەك كورسەتەمىز.
مىسالى، جارنامانى قاتە بەرگەن مەكەمەگە بارىپ، ءوزىمىزدىڭ كومەگىمىزدى ۇسىنامىز. ءتىل زاڭناماسىنىڭ 21-بابىنا سايكەس ولار تۇزەتۋگە كەتەتىن ۋاقىتتى بەلگىلەيدى. سول مەرزىم ىشىندە اتالعان مەكەمە جارناماداعى قاتەلەردى جوندەۋى ءتيىس. ءوزىمىزدىڭ تاراپىمىزدان، مانتىندەرىن جوندەپ، اۋدارماعا كومەك كورسەتەمىز.
وسى جىلى 2800 جارنامانىڭ ءماتىنىن تەكسەرىپ بەرۋگە ءوتىنىش ءتۇستى. سونىمەن قاتار، اعىمداعى جىلدىڭ العاشقى جارتى جىلدىعىندا زاڭ تالاپتارىن، ەرەجەلەرىن بۇزعان 173 جارناما تۋراسىندا ەسكەرتۋ جاسالدى. موراتوري كەلەسى جىلدىڭ 1 قاڭتارىنا دەيىن جالعاسىن تابادى»، - دەدى الماتى قالاسى تىلدەردى دامىتۋ، مۇراعاتتار جانە قۇجاتتاما باسقارماسىنىڭ ءبولىم باسشىسى قالاباي وتەپبەرگەن.
اتالمىش مەكەمەنىڭ قىزمەتكەرلەرى اپتاسىنا 1 رەت رەيتكە شىعادى. جۇمىس ۋاقىتىلى ورىندالىپ جاتىر. ناتيجەسى دە جوق ەمەس. دەسە دە ءالى دە «اتتەگەن-اي» دەيتىن تۇستارى جەتەرلىك. مىسالى، رايىمبەك جانە روزىباقيەۆ كوشەلەرىنىڭ قيىلىسىندا ورنالاسقان بازاردى ارالاپ ءجۇرىپ، بىرنەشە قاتە جارناماعا كوزىمىز ەرىكسىز ءتۇستى. «شاش ءورۋ» دەپ جارناما جاساۋدىڭ ورنىنا مەكەمە يەلەرى «شاش ءورىۋ» دەگەن. ءدال وسى عيماراتتىڭ الدىنان تاعى ءبىر قاتە تابىلدى. «ەرلەر شاشىن قيۋ جانە ساندەۋ» دەپ الىپبيدەگى «ي» ءارىپىن ۇمىتىپ كەتكەن.
«ءبىز مەكەمە يەلەرىنە ەسكەرتۋ جاسايمىز. ءبىزدىڭ ەسكەرتۋلەرىمىزدى دەر كەزىندە ەسكەرمەگەن مەكەمەلەرگە ايىپپۇل سالىنادى. شاعىن كاسىپورىندارعا - 10 ايلىق ايىپپۇل؛ ورتا كاسىپورىندارعا - 20 ايلىق ايىپپۇل؛ ءىرى كاسىپورىندارعا - 50 ايىپپۇل بەلگىلەنگەن»، - دەدى قالاباي وتەپبەرگەن.
مەرۋەرت ساعىمحان
Almaty.tv