نۇر- سۇلتاندا كوشى- قون زاڭناماسىن بۇزعان شەتەلدىكتەر 27 ميلليون تەڭگە ايىپپۇل تولەدى
بۇل تۋرالى نۇر- سۇلتان قالاسى پوليتسيا دەپارتامەنتى كوشى- قون قىزمەتى باسقارماسىنىڭ باسشىسى ارمان بايمۇحامەت ءمالىم ەتتى، دەپ حابارلايدى قازاقپارات ءتىلشىسى.
«جىل باسىنان بەرى ەلىمىزدىڭ كوشى- قون زاڭىن بۇزۋعا قاتىستى 2297 فاكتى تىركەلدى. ەلوردا اۋماعىندا جەدەل پروفيلاكتيكالىق شاراسى تۇراقتى ۇيىمداستىرىلىپ تۇرادى. اتالعان شارا اياسىندا تالاپتى بۇزىپ، ەل اۋماعىندا زاڭسىز جۇرگەن شەتەل ازاماتتارى انىقتالىپ جاتادى. جۇرگىزىلگەن شارالاردىڭ ناتيجەسىندە كوشى- قون زاڭىن بۇزعان شەتەل ازاماتتارىنا 27 ملن تەڭگە ايىپپۇل سالىندى. بۇل بيىلعى 3-اي بويىنشا كورسەتكىش. وتكەن جىلدىڭ وسى ۋاقىتىندا 20 ملن تەڭگەگە ايىپپۇل سالىنعان ەدى»، - دەدى ارمان بايمۇحامەت پوليسيا دەپارتامەنتىندە وتكەن باسپا ءسوز ءماسليحاتىندا.
ونىڭ ايتۋىنشا، شەتەلدىك ميگرانتتار نەگىزىنەن قازاقستان اۋماعىندا بولۋ ەرەجەسىن بۇزادى.
«ولار قازاقستانعا ۋاقىتشا تۇرۋعا، جۇمىس ىستەۋگە نەمەسە ساياحاتتاپ كەلەدى. سولاردىڭ ىشىندە ماۋسىمدىق جۇمىس ىستەۋگە كەلگەندەر زاڭدى ءجيى بۇزىپ جاتادى. ميگرانتتار قازاقستاندا ۋاقىتشا بولۋ مەرزىمى اياقتالعان سوڭ، قايتا تىركەلۋى ءتيىس. ال ولار بولسا تىركەلمەي جۇرە بەرەدى»، - دەيدى ول.
بۇعان دەيىن پوليتسيا دەپارتامەنتىنىڭ وكىلى 2023 -جىلدان باستاپ استانالىقتارعا جەكە كۋالىك بەرىلگەندە ساۋساق ءىزى الىناتىنىن ايتقان ەدى. سونداي- اق، بريفينگتە رەسەيدەن كەلگەن 48 ازامات پەن 10 ۋكراينالىق ەلوردادا تۇرۋعا ءوتىنىش بەرگەنى ءسوز بولدى.