زاڭسىز كوشى-قونعا قاتىستى 27 قىلمىستىق ءىس قوزعالدى - سەناتور
بۇل تۋرالى سەناتتىڭ جالپى وتىرىسىندا دەپۋتات نۇرلان بەكنازاروۆ ايتتى، دەپ حابارلايدى قازاقپارات ءتىلشىسى.
«مىسالى، پاندەميا كەزەڭىندە شەكارالار جابىلىپ، كوپتەگەن ميگرانتتار شەكتەۋلەرگە بايلانىستى قازاقستان رەسپۋبليكاسىنىڭ اۋماعىنان شىعا المادى، سوعان بايلانىستى ۇكىمەتتىڭ ارنايى قاۋلىسى قابىلدانىپ، ەلدە بولۋ مەرزىمى ۇزارتىلدى. جالپى، وسى جىلدىڭ قاڭتار-اقپان ايلارىندا حالىقارالىق كوشى- قون ۇيىمىمەن بىرلەسىپ جۇرگىزىلگەن جۇمىس ناتيجەسىندە 133 مىڭ ميگرانت ءوز ەلىنە ورالدى. ءوز ەركىمەن كەتۋدەن باس تارتقان جانە تەرگەۋ ورگاندارىنان جاسىرىنعان 674 شەتەل ازاماتى بەس جىل بويى قازاقستان اۋماعىنا كىرۋ قۇقىعىنسىز سوت تارتىبىمەن ەلدەن شىعارىلىپ، زاڭسىز كوشى- قون ۇيىمداستىرعانى ءۇشىن 27 قىلمىستىق ءىس قوزعالعان»، - دەدى نۇرلان بەكنازاروۆ.
ونىڭ ايتۋىنشا، كوشى-قون ەلىمىزدەگى ۇلتتىق قاۋىپسىزدىككە، الەۋمەتتىك - ەكونوميكالىق جاعدايعا تىكەلەي اسەر ەتەتىن سالا بولعاندىقتان، كوشى-قون پروتسەستەرىن رەتتەپ، زاڭسىز كوشى- قوننىڭ الدىن الۋ ءۇشىن ءتيىستى قۇقىقتىق نەگىزدەر جاساۋ وتە ماڭىزدى.
بۇدان بۇرىن حابارلانعانداي، بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ ۇكىمەتى مەن قىرعىز رەسپۋبليكاسىنىڭ ۇكىمەتى اراسىنداعى كوشى- قون سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭى قابىلداندى.