بۇل تۋرالى BMJ مەديتسينا جۋرنالىندا جاريالانعان ماقالاعا سىلتەمە جاساپ New York Times جازادى.
بىرنەشە جىل بويى ايەل وڭ جاق كوزىندەگى جايسىزدىققا ءمان بەرمەي، الاڭداۋعا ەش سەبەپ جوق دەپ ويلاعان. ءبىراق كاتاراكتا كەزىندە جاسالاتىن وپەراتسياعا دايىنداۋ بارىسىندا حيرۋرگتەر ايەلدىڭ كوزىنەن ءبىر- بىرىنە جابىسقان 27 لينزا الدى.
«دارىگەرلەر الدىمەن 17 لينزا تاپتى. ودان كەيىن كوزدە تاعى 10 لينزا تۇرعانى بايقالدى» ، دەلىنگەن ماقالادا.
وفتالمولوگتار ايەلدىڭ كوزىندە لينزا بارىن سەزبەگەنىنە تاڭعالعاندارىن جازىپتى. ايەلدىڭ كوزىندە لينزالار قاشاننان بەرى جينالعانى بەلگىسىز. ءبىراق ول 35 جىل بويى ءبىر رەتتىك لينزا تاققان.
دارىگەرلەردىڭ ايتۋىنشا، ەمدەلۋشىنىڭ كوزى ناشار كورگەندىكتەن، ول كوزىنە جينالعان بوگدە زاتتى سەزبەي قالعان.
«ول وڭ جاق كوزىندە ءبىر بوگدە دەنە تۇرعان سەكىلدى سەزىمدە بولعانىن ايتقان. ءبىراق الاڭداۋعا ەش سەبەپ جوق دەپ ويلاعان. لينزالار كوزدىڭ جوعارى بولىگىنە جينالا بەرگەندىكتەن، ونى انىقتاۋ دا قيىنعا سوقتى» ، دەيدى دارىگەرلەر.
ماقالادا ايتىلعانداي، دارىگەرلەر كوزگە تاعاتىن لينزالاردى قولدانۋدىڭ قاۋىپسىزدىك ەرەجەلەرىن دۇرىس قاداعالاۋ كەرەك ەكەنىن ەسكەرتۋ ءۇشىن بۇل جاعداي تۋرالى ماقالا جازىپ، كوپشىلىكتى اقپاراتتاندىرۋ كەرەك دەپ شەشكەن.
«لينزا كورۋ قابىلەتىن تۇزەتۋ ءۇشىن ءتيىمدى جول بولعانىمەن، ونى قولدانعان كەزدە اباي بولۋ كەرەك. بۇل ەمدەلۋشىنىڭ جولى بولدى. ءبىراق، دۇرىس قولدانباعان جاعدايدا لينزا ءتۇرلى اسقىنۋلارعا اكەلۋى مۇمكىن» ، دەيدى ماقالا اۆتورلارى.
وفتالمولوگتار كوز اۋرۋىن اسقىندىرماس ءۇشىن لينزامەن ۇيىقتاماۋعا، ۋاقىتىندا اۋىستىرىپ تۇرۋعا كەڭەس بەرەدى.
Baq.kz