اقتوبەدەگى جوعارى وقۋ ورنى 27 قىتايلىق كومپانيامەن مەموراندۋمعا قول قويدى
دەپ حابارلايدى قازاقپارات ءتىلشىسى.
اتالعان مەملەكەتتىك ۋنيۆەرسيتەت كونفۋتسي ينستيتۋتىنىڭ جۇمىسىن جانداندىرىپ جاتىر. قازاق- قىتاي ستۋدەنتتەرى جوعارى وقۋ ورىندارىنىڭ كەلىسىمىمەن ءبىر- بىرىنە بارىپ، ءبىلىمىن جەتىلدىرۋدە. سونىمەن قاتار، 20 وقىتۋشى ءوزارا الماسىپ، تاجىريبەلەرىن شىڭداپ ءجۇر. بۇگىن وقۋ ورنى قىتاي ينۆەستورلارىن قابىلداپ، كادر دايىنداۋ مەن عىلىمدى دامىتۋ جولىندا بىرگە جۇمىس ىستەۋگە كەلىستى.
«ۋنيۆەرسيتەت پەن كومپانيالار اراسىندا سەرىكتەستىك ورناتۋ، دۋالدى وقىتۋ جۇيەسىنىڭ نەگىزىندە بىرلەسە ءبىلىم بەرۋ، كومپانيالار بازاسىندا ستۋدەنتتەردى ءىس- تاجىريبەدەن وتكىزۋ، جۇمىسشىلاردى ۋنيۆەرسيتەتتە بىلىكتىلىكتى ارتتىرۋ كۋرستارىنان وتكىزۋ، عىلىمي- زەرتتەۋ جۇمىستارىن جۇزەگە اسىرۋ ءۇشىن الدىن- الا كەلىسسوز ءجۇرىپ، ءبىر بايلامعا كەلدىك. ۋنيۆەرسيتەت ءوز تاراپىنان كومپانيالاردىڭ وندىرىستىك سۇرانىستارىنا وراي مۇناي- گاز ءىسى، ەكونوميكا، فيلولوگيا ماماندىقتارىندا قوسىمشا ءبىلىم تراەكتوريالارىن مەڭگەرۋگە مۇمكىندىك بەرەتىن ءبىلىم باعدارلامالارىن جاساقتادى. سونداي- اق، مۇناي- گاز ءىسى، كولىك، كولىك تەحنيكاسى جانە تەحنولوگياسى، بەيورگانيكالىق، ورگانيكالىق زاتتاردىڭ حيميالىق تەحنولوگياسى، قۇرىلىس ماماندىقتارىندا دۋالدى وقىتۋدى ەنگىزۋ قولعا الىنۋدا. ستۋدەنتتەر ءۇشىن پراكتيكالىق، زەرتحانالىق ساباقتار، ديپلومدىق جوبالار بويىنشا ىزدەنىستەر، وندىرىستىك تاجىريبەلەر سول كومپانيالارىندا ۇيىمداستىرىلاتىن بولادى»، - دەدى ق. جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ رەكتورى باۋىرجان ەردەمبەكوۆ.
ايتا كەتەيىك، ىنتىماقتاستىق مەموراندۋمىنا قول قويعان كومپانيالار اراسىندا «س ن پ س- اقتوبە مۇنايگاز» ا ق، «ۇلى قابىرعا» ج ش س- ءى سەكىلدى ءىرى ءوندىرىس ورىندارى بار. باۋىرجان ەردەمبەكوۆ ءوندىرىس ورىندارىنىڭ باسشىلارىنا كومپانيا بازاسىندا ۋنيۆەرسيتەت كافەدرالارىنىڭ فيليالدارىن اشۋدى ۇسىندى.
«وقۋ ورنى مەن قىتاي كومپانيادارى اراسىنداعى كەلىسىم شارتقا ەكى اي بويى دايىندالدىق. مۇناي- گاز ءىسى، تەحنيكالىق ماماندىق يەلەرى مەن تىلشىلەردى سول كومپانيالاردىڭ سۇرانىسىنا ساي، جاڭا تەحنولوگيامەن وقىتۋدى جوسپارلاپ وتىرمىز. سونىمەن قاتار، كونفۋتسيي ينستيتۋتى ارقىلى قىتاي كومپانيالارىن قازاقتاندىرۋ ماسەلەسى قولعا الىندى. بۇعان دەيىن وبلىس اكىمى بەردىبەك ساپاربايەۆ قىتاي كومانياسىنىڭ جۇمىسشىلارىمەن كەزدەسۋىندە ەسكەرتۋ جاساعان بولاتىن. سۇرانىس بار، ولار قازاق ءتىلىن ۇيرەنگىسى كەلەدى»، - دەدى ۋنيۆەرسيتەت رەكتورى.
اۆتور: التىناي ساعىندىقوۆا