ەمتيحاندى 27 رەت تاپسىرعان 56 جاستاعى قىتايلىق بيىل دا ۋنيۆەرسيتەتكە تۇسە المادى
56 جاستاعى ليان شي كوپ جاعىنان تابىستى، شات-شادىمان عۇمىر كەشتى. ءتۇرلى سالالاردا جۇمىس ىستەدى، ءوز كاسىبىن اشىپ، ۇيلەنىپ، ۇلدى بولدى.
ءبىراق ونىڭ قول جەتپەگەن ءبىر ارمانى بار، ول - جوعارى وقۋ ورنىنا ءتۇسىپ، ديپلوم الۋ. الايدا ونى ىستەي الماعانى - باعىن سىناپ كورمەگەننەن نەمەسە دايىندالىپ، تىرىسپاعاننان ەمەس. ول وقۋعا ءتۇسۋ ءۇشىن 26 مارتە سىناق تاپسىرعان.
ليان ماۋسىمنىڭ باسىندا بۇكىل ەل بويىنشا 13 ميلليونعا جۋىق ستۋدەنتپەن بىرگە گاوكاۋ دەپ اتالاتىن ەكى كۇندىك اۋىر ەمتيحاندى تاپسىردى.
بۇل - ونىڭ 27-رەت گاوكاۋعا قاتىسۋى. 40 جىل بۇرىن، ياعني 1983 -جىلى ول العاش رەت وسى سىناقتى تاپسىرعان، سودان بەرى العان ۇپايىنا ەش قاناعاتتانعان ەمەس.
گاوكاۋ - قىتايدا جوعارى وقۋ ورنىنا ءتۇسۋدىڭ جالعىز كريتەريى. ۇمىتكەرلەرگە جىلىنا ءبىر عانا مۇمكىندىك بەرىلەدى.
ليان ءوزىنىڭ تاباندىلىعىنىڭ ارقاسىندا قىتايدا ءبىرشاما تانىمال. ءبىراق ءالى كۇنگە دەيىن كوزدەگەن كورسەتكىشىنە جەتە المادى.
گاوكاۋدى اياقتاعاننان كەيىن ول TikTok-تىڭ قىتايداعى بالاماسى Douyin-گە ۆيدەو ءتۇسىرىپ، بيىل ەمتيحان سۇراقتارى اۋىر بولعانىن، جاقسى ۇپاي جيناي الماۋى مۇمكىن ەكەنىن ايتتى.
«بيىل جاقسى ۋنيۆەرسيتەتكە تۇسە الماۋىم مۇمكىن»، - دەدى ول ۆيدەودا.
جۇما كۇنى جاريالانعان ناتيجە ونىڭ قورقىنىشىن راستادى. ليان جالپى 750 ۇپايدان 428 بال الدى، بۇل ونىڭ الدىڭعى جىلعى ناتيجەسىنەن تومەن.
بۇل جىلدار بويى رەيتينگتە كوش باسىندا تۇرعان سىچۋان ۋنيۆەرسيتەتى سياقتى ەليتالىق جوعارى وقۋ ورنىن بىلاي قويعاندا، كەي كوللەدجدەرگە تۇسۋگە دە جەتكىلىكسىز.
«قاتتى كوڭىلىم قالدى، شىنىمەن. ۇپايىم سونشالىقتى ناشار بولادى دەپ كۇتپەدىم. بۇل جولعى سىناق ءساتسىز بولعانىن سەزسەم دە، وتكەن جىلعىدان تومەن بال الامىن دەپ ويلامادىم»، - دەدى ول جەرگىلىكتى بۇقارالىق اقپارات قۇرالىنىڭ الەۋمەتتىك جەلىدەگى تىكەلەي ەفيرىندە.
گاوكاۋ ءتورت ءپاندى قامتيدى: قىتاي ءتىلى، ماتەماتيكا، اعىلشىن ءتىلى جانە جاراتىلىستانۋ عىلىمدارى (فيزيكا، حيميا جانە بيولوگيا) نەمەسە گۋمانيتارلىق عىلىمدار (ساياسات، تاريح جانە گەوگرافيا).
ليان تىكەلەي ەفيردە «بارلىق پاندەردەن كوڭىلى قالعانىن» ايتتى، اسىرەسە قىتاي ءتىلى جانە گۋمانيتارلىق ونەر پاندەرىنەن ەرەكشە تومەن ۇپاي العان.
سىچۋان تۋماسى ليان 1983 -جىلى تالاپكەر رەتىندە العاش رەت گاوكاۋ تاپسىردى، ءبىراق كوللەدجگە تۇسۋگە جەتكىلىكتى ەڭ تومەنگى بالدى دا جيناي المادى.
ودان كەيىن تاعى ەكى جىل تاپسىرىپ، الدىڭعىلارىنا ۇقساس ناتيجە كورسەتتى.
كەلەسى ون جىلدا ول تەحنيكا مەكتەبىندە ءبىلىم الدى، ءبىراق كوپ ۇزاماي وقۋىن تاستادى. باسقا دا ءتۇرلى جۇمىس ىستەپ، اعاش زاۋىتىندا ەڭبەكتەندى، سوسىن ۇيلەندى.
وسىنىڭ بارىنە قاراماستان، ول گاوكاۋ تاپسىرۋىن جالعاستىرا بەردى جانە اراسىندا ءتاۋىر ۇپاي جيناعان كەزى دە بولدى. مىسالى 1992 -جىلى نانكين ۋنيۆەرسيتەتىنە تۇسۋگە جەتكىلىكتى جوعارى بال جيناعان. ءبىراق وزىنە كوڭىلى تولماي ول ۇسىنىستان باس تارتتى.
گاوكاۋدا قويىلاتىن تالاپتارعا بايلانىستى ول سىناق تاپسىرۋدى توقتاتتى. ويتكەنى جاسى اسىپ كەتتى. سول ارالىقتا ساتۋشى بولىپ جۇمىس ىستەدى، زاۋىت اشىپ، كاسىپكەرلىكپەن اينالىستى.
2001 -جىلى ۇكىمەت تەستىلەۋگە قويىلاتىن جاس شەكتەۋىن الىپ تاستاپ، تالپىنىسىن قايتا باستاۋعا مۇمكىندىك بەردى.
ليان شي 2010 -جىلدان بەرى جىل سايىن گاوكاۋ تاپسىرادى.
بيىل ول سىناققا جاقسى دايىندالدى، كوپ وقىپ، ەڭبەكتەندى جانە قاي ۋنيۆەرسيتەتكە بالى جەتسە، سوعان تۇسۋگە بەل بۋدى.
سىچۋان ۋنيۆەرسيتەتىنە شاماسى جەتپەيتىنىن مويىنداپ، ءوزىن قابىلدايتىن كەز كەلگەن نەگىزگى ۋنيۆەرسيتەتكە تۇسۋگە شەشىم قابىلدادى.
ءبىراق جۇما كۇنى ناتيجەسىن كورگەندە 2024 -جىلى تەستىلەۋدى قايتا تاپسىراتىنىن ءتۇسىندى.
«كەلەسى جىلى دا ماقساتىما جەتە الماسام، وندا جوعارى وقۋ ورنىنا ءتۇسۋ جايلى ارمانىمنان باس تارتۋىم مۇمكىن»، - دەيدى ول.
بيىل قىتايدا 12,91 ميلليون ۇمىتكەر گاوكاۋ تاپسىرعان، بۇل وتكەن جىلعىدان 980 مىڭعا كوپ.
قىتايدا جاستار اراسىندا جۇمىسسىزدىق رەكوردتىق دەڭگەيدە - ,8. ساراپشىلار ونىڭ تاعى بىرنەشە جىل بويى جوعارى كۇيىندە قالا بەرەتىنىن ەسكەرتىپ وتىر.
اۆتور:
جانات قاپالبايەۆا