وبلىستىق پ د باسپا ءسوز قىزمەتىنىڭ حابارلاۋىنشا، 4 - جەلتوقساندا اققۋلى اۋدانىنىڭ پوليتسياسىنا شارۋا قوجالىقتارىنىڭ ءبىرىنىڭ باسشىسى قازى اۋىلىنان ون شاقىرىم جەردە ورنالاسقان جايىلىمنان بەلگىسىز بىرەۋلەر 26 باس جىلقىسىن ۇرلاپ كەتكەنىن ايتقان. بىرنەشە كۇن بويى يەسى جوعالعان مالدى ءوز بەتىنشە تابۋعا تىرىسقان، ءبىراق تابا الماعان سوڭ پوليتسياعا جۇگىنگەن.
اتالعان فاكتى بويىنشا پوليتسيانىڭ جەكە قۇرامى مەن اۋدانمەن شەكارالاس وڭىرلەرگە باعدار بەرىلدى. بىرنەشە موبيلدى توپتارعا ءبولىنىپ، پوليتسيا قىزمەتكەرلەرى جاقىن ماڭداعى بارلىق اۋماقتار مەن جايىلىمداردى مۇقيات ارالاپ، بارلىق شارۋا قوجالىقتارى مەن جايىلىمدىق جەرلەر، فەرمالار تەكسەرىلىپ، كۋاگەرلەر سۇرالدى. ءتورت اۆتوكولىكپەن 20-عا جۋىق پوليتسيا قىزمەتكەرى دالادا جوعالعان جانۋارلاردى ىزدەدى.
«ىزدەۋ شارالارىنىڭ ناتيجەسىندە 6 - جەلتوقساندا قازى اۋىلىنان 15 شاقىرىم جەردە ورنالاسقان ءبورلى كولىنەن مۇزعا قاتىپ قالعان 26 ولگەن جىلقى تابىلدى»، - دەدى اۋداندىق پوليتسيا ءبولىمىنىڭ باستىعى تاسقىن بودييەۆ.
پوليتسيا اۋىل تۇرعىندارىنا قىراعى بولۋدى جانە مالدى قاراۋسىز قالدىرماۋ قاجەتتىگىن ەسكەرتەدى. بۇعان دەيىن ەرتىس القابىندا جايىلىپ جۇرگەن جىلقىلاردىڭ يەلەرىنە ۇلكەن ايىپپۇل سالىناتىنى تۋرالى حابارلانعان بولاتىن.
www.24.kz