26- جەلتوقسان. بەيسەنبى
ەستە قالار وقيعالار
1931-جىلى قازاقستاننىڭ جوعارى اسكەري-وقۋ ورنى - قازاقستان رەسپۋبليكاسى ۇ ق ك شەكارا قىزمەتى اكادەمياسى قۇرىلدى. ول قازاقستان رەسپۋبليكاسى ۇ ق ك شەكارا قىزمەتىنە، ۇ ق ك- ءنىڭ باسقا بولىمشەلەرى مەن ورگاندارىنا وفيتسەرلەر دايارلايدى.
1960-جىلى تىڭ ولكەسى (تسەليننىي كراي) قۇرىلدى، ونىڭ قۇرامىنا اقمولا، كوكشەتاۋ (قازىرگى اقمولا وبلىسىنىڭ جانە سولتۇستىك قازاقستان وبلىسىنىڭ بولىگى)، قوستاناي، پاۆلودار جانە سولتۇستىك قازاقستان وبلىستارى كىردى. اكىمشىلىك ورتالىعى - سەلينوگراد قالاسى (1961-جىلعا دەيىن - اقمولا). 1965-جىلى 19- قازاندا تاراتىلدى.
1980-جىلى ورىس-نەمىس جازۋشىسى الەكساندر رەيمگەننىڭ پەساسى جەلىسى بويىنشا قازاقتار مەن نەمىستەردىڭ ءوزارا قارىم-قاتىناسى تۋرالى «تۇڭعىشتار» سپەكتاكلىمەن رەسپۋبليكالىق نەمىس دراما تەاترى اشىلدى. سپەكتاكلدىڭ رەجيسسەرى جانە ترۋپپانىڭ العاشقى جەتەكشىسى - ە. س. اراكەلوۆ.
1991-جىلى قازاقستان رەسپۋبليكاسى مەن ا ق ش اراسىندا ديپلوماتيالىق قارىم-قاتىناس ورنادى.
1995-جىلى «قازاقستان رەسپۋبليكاسىنىڭ پرەزيدەنتى تۋرالى» قازاقستان رەسپۋبليكاسىنىڭ كونستيتۋتسيالىق زاڭى قابىلداندى.
2009-جىلى استاناداعى بەيبىتشىلىك جانە كەلىسىم سارايىندا جاڭا رەداكسياداعى «كورسار» بالەتىنىڭ پرەمەراسى بولدى، ونى ەلباسى نۇرسۇلتان نازاربايەۆ تاماشالادى.
«كورسار» بالەتىندە ك. بايسەيىتوۆا اتىنداعى ۇلتتىق وپەرا جانە بالەت تەاترىنىڭ ارتىستەرى ق ر ەڭبەك سىڭىرگەن قايراتكەرى گۇلفايرۋس قۇرمانعوجايەۆا، حالىقارالىق كونكۋرستاردىڭ لاۋرەاتتارى مەن ديپلومانتتارى جاندوس اۋباكىروۆ، رۇستەم سەيىتبەكوۆ، تايىر عاتاۋوۆ، عاليا ماجاعۇلوۆا، ەلەنا سەمەنوۆا، ارتىستەر ءجانادىل بەيسەمبيەۆ پەن جانات سارسەمبايەۆ وينادى.
2016-جىلى قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ رەسەي فەدەراتسياسىنا رەسمي ساپارى اياسىندا سانكت-پەتەربۋرگتە «بايقوڭىر» كەشەنىندەگى كەلەشەكتەگى ىنتىماقتاستىق تۇجىرىمداماسىنا قول قويىلدى. تۇجىرىمداما قازاقستان مەن رەسەي پرەزيدەنتتەرىنىڭ «بايقوڭىر» كەشەنىندەگى ىنتىماقتاستىقتىڭ پەرسپەكتيۆالارىن پىسىقتاۋ تۋرالى ۋاعدالاستىقتارىنا سايكەس ازىرلەندى جانە 2050-جىلعا دەيىن ەسەپتەلىنگەن. تۇجىرىمداما جالعا الۋ قاتىناستارىن جالعاستىرۋ اياسىندا تاراپتاردىڭ بىرلەسىپ بايقوڭىر قالاسىنىڭ جانە عارىش ايلاعىنىڭ ينفراقۇرىلىمىن دامىتۋ (جەتىلدىرۋ)، ينۆەستيتسيالار تارتۋ، جاڭا جۇمىس ورىندارىن قۇرۋ، تۇرعىن ءۇي سالۋ، تۋريزمدى دامىتۋ تۋرالى ۋاعدالاستىعىن بەكىتەدى. ءبىراق باستىسى - بۇل عارىش ايلاعىنىڭ قولدانىستاعى ينفراقۇرىلىمىنىڭ نەگىزىندە جاڭا بىرلەسكەن عارىشتىق جوبالاردى جانە ەڭ الدىمەن «بايتەرەك» جوباسىن ىسكە اسىرۋ.
2017-جىلى استاناداعى ق ر تۇڭعىش پرەزيدەنتى - ەلباسى كىتاپحاناسىنا بەلارۋس باسپاگەرى فرانتسيسك سكورينانىڭ قولجازبا باسىلىمدار جيناعى سىيعا تارتىلدى. اعارتۋشىنىڭ دۇنيە ءجۇزى بويىنشا جيىنى 520 عا جۋىق باسىلىمى ۇلى بريتانيا، گەرمانيا، دانيا، ليتۆا، پولشا، سلوۆەنيا، رەسەي، ا ق ش جانە ۋكراينانىڭ كىتاپحانا، مۋزەي مەن مۇراعاتتارىندا جيناقتالعان.
2018-جىلى قازاقساتننىڭ قارۋلى كۇشتەرنىڭ تاريحىندا تۇڭعىش رەت بىتىمگەرلەر قاتارىنا اسكەري قىزمەتكەر ايەل، مايور شولپان تاۋىشوۆا قوسىلدى.
ءبىر جىل بويى 30 ەلدىڭ اسكەري قىزمەتكەرلەرىمەن بىرگە مايور شولپان تاۋشيەۆا باتىس ساحاراداعى بىتىمگەرشىلىك ميسسياسىنا اسكەري باقىلاۋشى رەتىندە قاتىسادى.
2018-جىلى تۇركيانىڭ بولۋ قالاسىنا تۇركى جۇرتىنا ورتاق تۇلعا كوروعلىنىڭ ەسكەرتكىشى ورناتىلدى. قازاقستاندىق ءمۇسىنشى مۇرات مانسۇروۆتىڭ تۋىندىسى ەسكەرتكىشتىڭ اتىمەن اتتاس حالىقارالىق ساياباققا قويىلدى. سالماعى 500 توننا، بيىكتىگى 70 مەتر بولاتىن الىپ ءمۇسىن تۇركياعا بولشەكتەلىپ جەتكىزىلدى. جوبانىڭ اننوتاتسياسىن بەلگىلى اقىن، جازۋشى ولجاس سۇلەيمەنوۆ جازدى.
«كوروعلى» - XVII عاسىردا ورتا ازيا مەن تاياۋ شىعىستا كەڭ تارالعان تۇركى حالىقتارىنىڭ فولكلورلىق- ەپيكالىق ەسكەرتكىشى.