رەسەي پرەزيدەنتتىگىنە ۇمىتكەرلەردىڭ پىكىر تالاسى 26 -اقپاندا باستالادى
سايلاۋالدى دەباتتار ءۇشىن تەگىن ەفيرلىك ۋاقىتتى: «روسسيا 1»، «پەرۆىي كانال»، «روسسيا 24»، «تۆ سەنتر»، رەسەيدىڭ قوعامدىق تەلەارناسى، «راديو روسسي» تەلەارناسى، «ماياك» جانە «ۆەستي ف م» ۇسىندى.
ر ف ورتالىق سايلاۋ كوميسسياسىنان ءمالىم ەتكەندەي، تەلەارنالار مەن راديوستانسيالار «بىرلەسكەن اگيتاتسيالىق ءىس- شارالاردىڭ» فورماتىن وزدەرى بەلگىلەيتىن بولادى. ياعني ولار پىكىرسايىس، «دوڭگەلەك ۇستەل» نەمەسە دەباتتار تۇرىندە ءوتۋى مۇمكىن.
رەسەيدىڭ ءىس باسىنداعى پرەزيدەنتى، جاڭا مەرزىمگە ءوز-ءوزىن ۇسىنىپ وتىرعان ۆلاديمير پۋتين دەباتتارعا قاتىسۋدان باس تارتقاندىقتان، تەلەكورەرمەندەر جەتى كانديداتتىڭ: سەرگەي بابۋريننىڭ («رەسەي جالپى حالىقتىق وداعى» پارتياسى)، پاۆەل گرۋدينيننىڭ (رەسەي فەدەراتسياسى كوممۋنيستىك پارتياسى)، ۆلاديمير جيرينوۆسكيدىڭ (رەسەيدىڭ ليبەرالدى دەموكراتيالىق پارتياسى)، كسەنيا سوبچاكتىڭ («ازاماتتىق باستاما»)، ماكسيم سۋرايكيننىڭ («رەسەي كوممۋنيستەرى»)، بوريس تيتوۆتىڭ (ءوسىم پارتياسى) جانە گريگوري ياۆلينسكيدىڭ («الما») پىكىر تالاسىن تاماشالايتىن بولادى.
ايتا كەتەيىك، رەسەيدىڭ ليبەرالدى دەموكراتيالىق پارتياسىنىڭ ءتوراعاسى ۆلاديمير جيرينوۆسكي تىكەلەي ەفيردەگى كەيبىر سايلاۋالدى دەباتتاردان باس تارتىپ، ولاردى الدىن الا جازىپ كورسەتۋدى ۇسىندى.
فوتو: NTTS. LT