شىعىس قازاقستان وبلىسىنىڭ ءوندىرىس كولەمى 260 ەسە وسكەن

استانا. قازاقپارات - تاۋەلسىزدىك جىلدارى ىشىندە شىعىس قازاقستان وبلىسىنىڭ جالپى ءوندىرىسى 260 ەسە ءوستى. ونەركاسىپتىك ءونىم كولەمى 34,1 مىڭ ەسەگە ارتقان. ونىڭ ىشىندە اسىرەسە كەندى التايداعى تاۋ- كەن ونەركاسىبىنىڭ دامۋ قارقىنى ەرەكشە.

وبلىس اۋماعىندا بۇرىن- سوڭدى بولماعان جاڭا زاۋىتتار مەن كاسىپورىندار اشىلىپ، يندۋستريالىق باعدارلامالار ءوز جەمىسىن بەردى. 18 مىڭنان استام جاڭا جۇمىس ورنى اشىلدى. مەتاللۋرگيا سالاسىندا ويىپ تۇرىپ ورىن العان ورتالىق. ماشينا قۇراستىرۋداعى جەتەكشى ولكە. استى- ءۇستى قازىناعا تولى كەندى ايماق.

 بۇگىنگى شىعىس قازاقستان تۋرالى اۋىز تولتىرىپ ايتار جەتىستىكتەردى تىزبەكتەپ تاۋىسا الماسپىز. يندۋستريالاندىرۋ كارتاسى جۇمىس جاساعالى بەرى وبلىستا 236 ميلليارد تەڭگەنىڭ 44 جوباسى ىسكە استى. ەندى تاعى 82 جوبا ەنگىزىلىپ وتىر. بۇل باستامالار ناتيجەلى بولسا، 19 مىڭ جاڭا جۇمىس ورنى اشىلادى. شىعىس قازاقستاننىڭ ماقتانىشىنا اينالعان كاسىپورىنداردىڭ ءبىرى - «ازيا اۆتو» زاۋىتى. وسىدان 14 جىل بۇرىن اشىلعان كاسىپورىندا قازاقستاندىق كولىكتىڭ باسىم بولىگى شىعارىلادى. شىعىس قازاقستاننىڭ تاۋەلسىزدىك جىلدارىنداعى ءتول تۋىندىسى «ازيا اۆتو» زاۋىتىنىڭ ەندىگى كوزدەگەن مەجەسى بيىك.

قازىر الاڭقايدا «ازيا اۆتو» قازاقستان تولىق كەشەندى زاۋىتىنىڭ قۇرىلىسى ءجۇرىپ جاتىر. 2018 -جىلى قۇرىلىسى اياقتالاتىن كەشەندە جىلىنا 120 مىڭ دانا اۆتوكولىك شىعارىلادى، 4 مىڭ جاڭا جۇمىس ورنى اشىلادى. وسىلايشا ەلىمىزدەگى ەڭ ءىرى اۆتوكولىك قۇراستىرۋ زاۋىتى ءبىزدىڭ ولكەمىزدە بوي كوتەرەدى. وسىنداي الپاۋىت زاۋىتتاردى بىلاي قويعاندا، شالعاي اۋدانداعى تاۋەكەلشىل كاسىپكەرلەر دە اۋىلشارۋاشىلىق تەحنيكاسىن قۇراستىرۋعا كىرىسىپ كەتكەن.

 زايسان اۋدانىنداعى «يرتىش ت ز» زاۋىتى قىتايمەن ەكى اراداعى مەموراندۋم قولداۋىمەن وتكەن جىلى اشىلدى. قازىر سول ەلدەن اكەلىنگەن بولشەكتەردەن شاعىن تراكتورلار قۇراستىرىلىپ، ساتىلىمعا شىعارىلۋدا. القاپتا جۇمىس ىستەۋگە ىڭعايلى، جوندەلۋى دە قۇنى ءارى ارزان.

ارمان تۇرىسبەكوۆ، وبلىستىق اۋىل شارۋاشىلىق باسقارماسى باسشىسىنىڭ ورىنباسارى:

- 800 مىڭ تەڭگە تۇرادى، ارزان، ءار قوجالىقتىڭ كۇشى جەتە بەرمەيدى ۇلكەن تراكتور ساتىپ الۋعا، بۇل شاعىن تراكتورلار بولعان سوڭ القاپتى جەردە جۇمىس ىستەۋگە قولايلى.

 «جۇمىسپەن قامتۋدىڭ جول كارتاسى» باعدارلاماسى جۇمىسسىز وتىرعان اۋىلدىقتار ءۇشىن باعا جەتپەس قولداۋ بولدى. 2011 -جىلدان بەرى وڭىردە 5 مىڭنان استام شارۋا قوجالىعى مەن شاعىن فەرمالار اشىلدى. وسى جوباعا بەلسەنە قاتىسقانداردىڭ ءبىرى - شەمونايحالىق ەلەنا كريۋچكوۆا. جەڭىلدەتىلگەن نەسيەگە ءسۇت تاسىمالدايتىن كولىك العان ول ءسۇت جيناپ، ونى وتكىزىپ كوپ- كورىم تابىس تابادى.

ەلەنا كريۋچكوۆا، جەكە كاسىپكەر:

- «جۇمىسپەن قامتۋدىڭ جول كارتاسى» باعدارلاماسىنىڭ تيگىزگەن كومەگى ەرەكشە. ويتكەنى سول ارقىلى ءبىز جەڭىلدەتىلگەن نەسيەگە قول جەتكىزىپ، ءىسىمىزدى اشتىق. مىناداي سالقىنداتقىش مودۋل دە ساتىپ الدىق.

وبلىستاعى مەديتسينالىق قىزمەت ساپاسى جىل سايىن جوعارىلاپ كەلەدى. بيىل دەنساۋلىق ساقتاۋ سالاسىن دامىتۋعا 246 ميلليارد تەڭگە قارجى ءبولىندى. 50 جىلدىق ەڭبەك ءوتىلى بار وبلىستىق اۋرۋحانانىڭ دارىگەر- ساراپشىسى تاتيانا چۋيانوۆا مەديتسينانىڭ بۇگىنگى الەۋتىنە تاڭ قالادى.

 تاتيانا چۋيانوۆا، وبلىستىق اۋرۋحانانىڭ دارىگەر- ساراپشىسى:

 - بۇگىنگى تەحنولوگيا ادام تانىماستاي وزگەرگەن. مەن كەزىندە بۇل جەرگە كەلگەن كەزدە جۇرەك اۋرۋلارىن زەرتتەۋ، وعان وپەراتسيا جاساۋ دەگەن نارسە اتىمەن جوق بولعان. ەندى، مىنەكي، كارديولوگيا ءبولىمى بولەك، جانساقتاۋ بولىمدەرى بولەك. قولىمىزدا سىرقاتتاردى امان الىپ قالۋعا كوپ مۇمكىندىكتەر بار.

 تابيعاتىنا ءتىل جەتپەيتىن شىعىس قازاقستاندا كەنجەلەتۋگە بولمايتىن سالالاردىڭ ءبىرى - تۋريزم. سۋى شيپا الاكول، مايقان بالىعىمەن تانىمال مارقاكول، بالى مەن پانتىسى دەرتكە داۋا قاتونقاراعاي ۇلتتىق پاركىن بىلمەيتىن ادام جوق. جالپى، وبلىستا تابيعاتى ەرەكشە قورعاۋداعى ۇلتتىق ماڭىزعا يە 24 اۋماق بار. قازىر شىعىستاعى شوقتىعى بيىك وسى تۋريستىك باعىتتاردىڭ جارناماسىن كۇشەيتىپ، ينفراقۇرىلىمىن مىقتاۋعا كۇش سالىنۋدا.

www.24.kz