تالدىقورعان اكىمدىگى 26 ميلليون تەڭگەگە 5 قوعامدىق دارەتحانا ورناتتى
08:09, 26 - ءساۋىر 2023
تالدىقورعان. قازاقپارات - تالدىقورعان اكىمدىگى 26 ميلليون تەڭگەگە 5 قوعامدىق دارەتحانا ورناتتى. ءارقايسىنىڭ باعاسى 5 ميلليون تەڭگەدەن اسادى، دەپ حابارلايدى قازاقپارات ءتىلشىسى.
تالدىقورعان قالالىق اكىمدىگىنىڭ مالىمەتىنشە، قوعامدىق دارەتحانالار ءالى ىسكە قوسىلماعان.
«يجەنەرلىك ياعني، جارىق، سۋ جۇيەلەرى تارتىلعاننان كەيىن پايدالانۋعا بەرىلەدى»، - دەلىنگەن ۆەدومستۆونىڭ حابارلاماسىندا.
ال دارەتحانالار ورناتىلعان جەر كەزدەيسوق تاڭدالماعان. قالا تۇرعىندارىنا ارنايى ساۋال جولدانىپ، حالىقتىڭ قالاۋى بويىنشا قويىلاتىن ورىندار انىقتالعان.
جالپى، ءار قوعامدىق نىسان زاماناۋي ۇلگىدە جاساقتالعان. 11 شارشى مەتر اۋماقتى قامتيدى. سۋدى جىلىتۋعا ارنالعان 25-50 ليترلىك بويلەر، ارنايى قولدى قۇرعاتاتىن قۇرىلعى، قوقىس جاشىگى سىندى قاجەتتى دۇنيەنىڭ بارلىعى بار. نىساننىڭ اينالاسىنا بەينەباقىلاۋ كامەراسى دا ورناتىلعان. ال قوعامدىق دارەتحانا اقىلى نەمەسە تەگىن قىزمەت ەتەتىنى ازىرگە بەلگىسىز.