قاراشادا 25- گرادۋسقا دەيىن اياز بولادى

استانا. قازاقپارات - قازگيدرومەت سينوپتيكتەرى قاراشاداعى اۋا رايى بولجامىن جاريالادى، - دەپ حابارلايدى قازاقپارات.

سينوپتيكتەر مالىمەتىنشە، قاراشادا رەسپۋبليكادا اۋا تەمپەراتۋراسى كليماتتىق نورما شەگىندە بولادى. ەلدىڭ باتىس جارتىسىندا جاۋىن-شاشىن نورمادان از، ال شىعىستا نورما شەگىندە جاۋادى.

قاراشانىڭ باسىندا سكانديناۆيادان رەسەيدىڭ ەۋروپالىق اۋماعى ارقىلى تسيكلون ۇلكەن جىلدامدىقپەن قازاقستان اۋماعىنا اۋىسادى. سوندىقتان اۋا رايى تۇراقسىز بولادى. جاۋىن-شاشىن جاڭبىر مەن قار تۇرىندە بولادى دەپ كۇتىلەدى، رەسپۋبليكانىڭ وڭتۇستىگىندە جاڭبىر جاۋادى. اتموسفەرالىق فرونتتارعا بايلانىستى جاۋىن-شاشىن، كوكتايعاق ەلىمىزدىڭ سولتۇستىك-باتىسىندا، سولتۇستىگىندە، ورتالىعىندا تىركەلەدى جانە جەل جىلدامدىعى سەكۋندىنا 15-28 مەترگە دەيىن كۇشەيەدى.

قاراشانىڭ العاشقى كۇندەرىندە قازاقستان اۋماعى بويىنشا اۋا تەمپەراتۋراسى تۇندە 5+5- گرادۋس، كۇندىز 1+9+ گرادۋس، ەلىمىزدىڭ وڭتۇستىگى مەن وڭتۇستىك-شىعىسىندا جىلى، ياعني كۇندىز 10+18+ گرادۋس بولادى.

ءبىرىنشى ون كۇندىكتىڭ ورتاسىنان باستاپ تسيكلون شىعىس باعىتتا جىلجىپ، قازاقستان اۋماعىنان كەتەدى. بۇل تسيكلوننىڭ ىزىنەن قارا تەڭىز ايماقتارىنان انتيتسيكلون تارالادى، بۇل جاۋىن-شاشىننىڭ باتىس وڭىرلەردە توقتاۋىنا اسەر ەتەدى. ون كۇندىكتىڭ سوڭىندا رەسپۋبليكانىڭ قالعان اۋماعىندا دا جاۋىن-شاشىن توقتايدى. اۋا تەمپەراتۋراسى ەلىمىزدىڭ سولتۇستىك جارتىسىندا تۇندە -3-13- گرادۋسقا دەيىن، كۇندىز5+2- گرادۋسقا دەيىن، وڭتۇستىك جارتىسىندا تۇندە 5+2- گرادۋسقا دەيىن، كۇندىز 0, 8+ گرادۋسقا دەيىن بىرتىندەپ تومەندەيدى.

ايدىڭ ەكىنشى جانە ءۇشىنشى ون كۇندىگىندە قازاقستان اۋماعىندا سولتۇستىك تەڭىز، باتىس جانە شىعىس ءسىبىر اۋداندارىنان سۋىق اۋا ماسسالارى ءجيى كەلىپ، تۇراقسىز اۋا رايى بولادى. اۋا رايى بىلاي تومەندەۋى مۇمكىن:

- سولتۇستىك جارتىسىندا تۇندە 17-25- گرادۋسقا دەيىن، كۇندىز 5-12- گرادۋسقا دەيىن؛

- وڭتۇستىك جارتىسىندا تۇندە 10-17- گرادۋسقا دەيىن، كۇندىز 3-10- گرادۋسقا دەيىن.

الايدا قازاقستان اۋماعىنا اتلانتيكا مەن يران اۋماعىنان اۋا ماسسالارى اۋىساتىن جىلى كۇندەر دە بولادى.