«25- قازان - ول ماڭىزدى داتا. قازىرگى كەزدە 25- قازان جايىندا از ايتىپ ءجۇرمىز. بۇل ءوز كەزەگىندە دۇرىس ەمەس دەپ سانايمىن. شىن مانىندە ءبىزدىڭ تاۋەلسىزدىك 25- قازاننان باستاۋ الادى، ياعني قازاقستاننىڭ مەملەكەتتىك ەگەمەندىگى تۋرالى دەكلاراتسيا قابىلدانعان. وسىدان كەيىن ناقتى قادامدار جاسالدى»، - دەدى م. اشىمبايەۆ سەناتتىڭ جالپى وتىرىسىنان كەيىن تىلشىلەر ساۋالىنا جاۋاپ بەرە وتىرىپ.
وسى ورايدا ول بۇل داتانى ۇلتتىق مەرەكە رەتىندە اتاپ ءوتۋ وتە ماڭىزدى ەكەنىن جەتكىزدى
«اتاپ ايتقاندا، تاريحي ءارى ءادىل شەشىم جاسالىپ وتىر. ءبىز وسى كۇندى ۇمىتپاي، قوعامدا كوبىرەك ايتۋىمىز كەرەك»، - دەدى سەنات ءتوراعاسى.
سونىمەن قاتار ول تۇڭعىش پرەزيدەنت كۇنىن مەملەكەتتىك مەرەكە قاتارىنان الىپ تاستاۋعا قاتىستى پىكىر ءبىلدىردى.
«5- ماۋسىمدا رەفەرەندۋم ءوتتى. وسى وزگەرىستەر اياسىندا حالىق شەشىمىمەن كونستيتۋتسيادان تۇڭعىش پرەزيدەنتكە قاتىستى پۋنكتەر الىنىپ تاستالدى. بۇل جاعدايدا ەل حالقى بۇل پۋنكتەر اتا زاڭنان شىعارىلۋى ءتيىس دەپ داۋىس بەرگەنىن ەسكەرسەك، بۇل كۇندى مەملەكەتتىك مەرەكە دەپ قالدىرۋ دايەكسىز بولادى. ءبىز قازىر كونستيتۋتسيا نورمالارىن ىسكە اسىرۋىمىز كەرەك. سوندىقتان حالىق قالاۋىن ورىنداپ جاتىرمىز»، - دەدى م. اشىمبايەۆ.
بۇدان بۇرىن حابارلانعانداي، 7- قىركۇيەكتە پارلامەنت ءماجىلىسى تۇڭعىش پرەزيدەنت كۇنىن مەملەكەتتىك مەرەكە قاتارىنان الىپ تاستاۋدى قولدادى.
اتاپ ايتقاندا، وسى باستاما «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كينەماتوگرافيا جانە مادەنيەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا قامتىلعان.
«ياعني 25- قازاندى ۇلتتىق مەرەكە - رەسپۋبليكا كۇنى رەتىندە ايقىنداۋ، 16- جەلتوقسان - تاۋەلسىزدىك كۇنىن مەملەكەتتىك مەرەكە رەتىندە بەلگىلەۋ ەسكەرىلگەن. بۇدان باسقا، 1- جەلتوقسان - تۇڭعىش پرەزيدەنت كۇنىن مەرەكەلەۋدى مەملەكەتتىك رامىزدەر كۇنى، العىس ايتۋ كۇنى جانە قوعامدىق ماڭىزى جوعارى الەۋەتى بار وزگە دە كۇندەر سياقتى، ونى مەملەكەتتىك مەرەكەلەر قاتارىنان الىپ تاستاۋ ارقىلى ايقىنداۋ ۇسىنىلدى»، - دەدى ءماجىلىس دەپۋتاتى جاناربەك ءاشىمجانوۆ.