قاۋلىدا جازىلعانداي، ءوڭىر بويىنشا كارانتين 25 - قاراشاعا دەيىن ۇزارتىلدى. شەكتەۋ شارالارىنىڭ مەرزىمى وبلىس اۋماعىندا COVID-19 ينفەكسياسىنىڭ تارالۋى بويىنشا احۋالدىڭ وزگەرۋىنە سايكەس قايتا قارالۋى مۇمكىن.
«وسكەمەن، سەمەي، ريددەر، كۋرچاتوۆ قالالارىنىڭ جانە اۋدانداردىڭ پەريمەترى بويىنشا شەكتەۋ شارالارىنىڭ قولدانىلۋ شەكارالارى ساقتالدى. وسكەمەن مەن سەمەي قالالارىندا 40 ۋچاسكەلىك پوليتسيا پۋنكتى قوعامدىق ءتارتىپتى باقىلايدى. تۇرعىندارعا جالعا الىنعان ۇيلەر مەن عيماراتتاردا كورپوراتيۆتىك، سالتاناتتى، وتباسىلىق جانە باسقا دا بۇقارالىق ءىس- شارالار وتكىزۋگە بولمايدى. 65 جاستان اسقان ادامدارعا جانە حالىقتىڭ الەۋمەتتىك قورعالاتىن توپتارىنا ءبىرىنشى كەزەكتە قاجەتتى تاۋارلاردى، ازىق- تۇلىك پەن دارىلىك زاتتاردى جەتكىزۋمەن اينالىساتىن ۆولونتەرلەردىڭ جۇمىسى جالعاسادى»، - دەلىنگەن قۇجاتتا.
ويىن- ساۋىق مەكەمەلەرىنىڭ جۇمىس ىستەۋىنە (كاراوكە، بيليارد، كومپيۋتەرلىك كلۋبتار، تۇنگى كلۋبتار، بوۋلينگ ورتالىقتارى، جابىق ءۇي- جايلارداعى بالالاردىڭ ويىن الاڭدارى مەن اتتراكتسيوندارى، كينوتەاترلار، بۋكمەكەرلىك كەڭسەلەر، فۋدكورتتار) جانە وبلىسىشىلىك اۆتوبۋستاردىڭ قاتىناۋىنا تىيىم ساقتالعان. سونداي- اق ايماق شەكاراسىنداعى 15 سانيتارلىق پوستتىڭ جۇمىسى ارى قاراي جالعاسا بەرمەك.
«الەۋمەتتىك قاشىقتىق پەن ماسكالىق رەجيمدى ساقتاعان كەزدە حالىقتىڭ كوشەدە، ساياباقتاردا، جاعالاۋلاردا ءبىر وتباسى مۇشەلەرىن قوسپاعاندا، جەكە نەمەسە 3 ادامنان اسپايتىن توپپەن جۇرۋلەرىنە، سونداي- اق اشىق اۋادا جەكە جانە توپتىق (5 ادامنان اسپايتىن مولشەردە) جاتتىعۋ جاساۋعا رۇقسات ەتىلدى. قوعامدىق تاماقتانۋ وبەكتىلەرى، فيتنەس- ورتالىقتار ساعات 07.00-دەن 22.00-گە دەيىن جۇمىس ىستەيدى. ءبىراق دەمالىس جانە مەرەكە كۇندەرى جابىق بولادى. ال ازىق- تۇلىك ساتپايتىن ساۋدا ورىندارىنىڭ، سۇلۋلىق سالوندارىنىڭ، شاشتارازداردىڭ، مونشالار مەن مادەنيەت وبەكتىلەرىنىڭ جۇمىس رەجيمى دۇيسەنبىدەن- جۇماعا دەيىن ساعات 07.00-19.00 ارالىعىندا جالعاسادى»، - دەپ جازىلعان جاڭا قاۋلىدا.
اۆتور: تالعاتجان مۇحامەتبەك ۇلى