«كەلە جاتقان جاڭا جىلعا وراي شىن جۇرەكتەن شىققان قۇتتىقتاۋىمىزدى قابىل الىڭىزدار! بۇل - بارشاعا قۋانىش، جان جىلۋى مەن بولاشاققا دەگەن ىزگى ءۇمىت سىيلايتىن ەڭ جارقىن جانە اسىعا كۇتەتىن وتباسىلىق مەرەكەلەردىڭ ءبىرى. وتكەن جىل ماڭىزدى جانە تاعدىرشەشتى قوعامدىق-ساياسي وقيعالار جىلى بولدى. حالىقتىڭ دانالىعى ارقاسىندا قازاقستان دامۋ مەن جاسامپازدىق جولىن جالعاستىردى. ءبىز كۇش-قۋاتىمىزدىڭ بىرلىكتە ەكەنىن جانە ونىڭ پىكىرلەر الۋاندىعىنا، تاسىلدەردىڭ ارتۇرلىلىگىنە، جاڭا يدەيالاردىڭ بايلىعىنا سۇيەنەتىنىن ءىس جۇزىندە دالەلدەدىك»، - دەلىنگەن ق ح ا قۇتتىقتاۋىندا.
جاڭا 2020-جىلى قازاقستان حالقى اسسامبلەياسى مەن ەل كونستيتۋتسياسىنىڭ 25 جىلدىعىن اتاپ ءوتۋ مىندەتى تۇر.
«سونىمەن بىرگە، ازاماتتىق جاۋاپكەرشىلىك سەزىمى مەن ەرىكتى قىزمەت ەتۋ ارقىلى ءومىردى جاقسارتاتىن ۆولونتەرلەر جىلى كەلە جاتىر. ابايدىڭ 175 جىلدىعى مەن ءابۋ ناسىر ءال-فارابيدىڭ 1150 جىلدىعى ۇلى دالانىڭ رۋحاني مادەنيەتىنىڭ، عىلىمى مەن تاريحىنىڭ جاڭا قىرلارىن اشادى. كەلەر جىلى حالىقتىڭ ءال-اۋقاتىن ارتتىرۋ ءۇشىن بىرلەسىپ كۇش-جىگەر جۇمسايمىز»، - دەپ جازدى ق ح ا.