جاپونيامەن اتوم ەنەرگياسىن پايدالانۋ جونىندەگى ىنتىماقتاستىعىمىزعا 25 جىل تولدى - پرەزيدەنت

نۇر-سۇلتان. قازاقپارات - قازاقستان پرەزيدەنتى قاسىم-جومارت توقايەۆ «مارۋبەني» ساۋدا كومپانياسىنىڭ ۆيتسە-ءتوراعاسى شيگەرۋ يامازوەنى قابىلدادى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.

مەملەكەت باسشىسى جاپوندىق ساۋدا كومپانياسىنىڭ تابىستى قىزمەت اتقارىپ جاتقانىن اتاپ ءوتىپ، شەتەلدىك ينۆەستورلار كەڭەسىنىڭ پلەنارلىق وتىرىسىنا قاتىساتىنىنا ريزاشىلىعىن ءبىلدىردى.

-  ءبىزدىڭ جاپونيامەن اتوم ەنەرگياسىن بەيبىت ماقساتتا پايدالانۋ جونىندەگى ىنتىماقتاستىعىمىزعا بيىل 25 جىل تولدى. ءبىز وسى ارالىقتا قارىم-قاتىناستاردى جان-جاقتى كەڭەيتىپ ءارى نىعايتا الدىق. سونىڭ ىشىندە، ەكىجاقتى ءتيىمدى ساۋدا-ەكونوميكالىق بايلانىسىمىز ارتتى. «مارۋبەني» كومپانياسى قازاقستان نارىعىندا 1993-جىلدان بەرى تابىستى جۇمىس ىستەپ كەلەدى، -  دەدى قاسىم-جومارت توقايەۆ.

شيگەرۋ يامازوە قازاقستان مەن جاپونيا اراسىنداعى قارىم-قاتىناستاردىڭ نەگىزىن سالعان ق ر تۇڭعىش پرەزيدەنتى نۇرسۇلتان نازاربايەۆتىڭ ەڭبەگىن ەرەكشە اتاپ ءوتىپ، مەملەكەت باسشىسى قاسىم-جومارت توقايەۆتىڭ بارلىق سالاداعى ەكىجاقتى ىنتىماقتاستىقتى ودان ءارى جالعاستىراتىنىنا سەنىم ءبىلدىردى.

-  ءبىز 30 جىلعا جۋىق قازاقستان نارىعىندا جۇمىس ىستەپ كەلەمىز. وسى ارالىقتا ءبىز ينفراقۇرىلىم، ەنەرگەتيكا، كولىك سالالارىنا ارالاسىپ، نۇر-سۇلتان قالاسىنىڭ اۋەجاي قۇرىلىسىنا دا قاتىستىق. سونىمەن قاتار، ءبىز 2007-جىلدان بەرى ەكى ەل دوستىعىنىڭ سيمۆولى ىسپەتتەس -  «حوراسان» جوباسىنا دا قاتىسىپ كەلەمىز، -  دەدى شيگەرۋ يامازوە.