سينگاپۋردا قازاقستانمەن ديپلوماتيالىق قارىم-قاتىناستىڭ 25 جىلدىعى اتالىپ ءوتتى
شاراعا سينگاپۋر ۇكىمەتىنىڭ، ديپلوماتيالىق كورپۋسىنىڭ، بيزنەس-قۇرىلىمدارىنىڭ، مادەني جانە عىلىمي ورتانىڭ، ب ا ق وكىلدەرىمەن بىرگە ارالداعى مەملەكەتتە ءومىر ءسۇرىپ جاتقان قازاقستاننىڭ ازاماتتارى قاتىستى. قازاقستانداعى سينگاپۋردىڭ ەلشىسى زۋلكيفلي باحارۋدين كەشتىڭ قۇرمەتتى قوناعى بولدى.
ءوز سوزىندە سينگاپۋرداعى قازاقستاننىڭ ەلشىسى ۇسەن سۇلەيمەن ەكى ەلدىڭ اراسىنداعى ىنتىماقتاستىقتىڭ ىرگەتاسىن قوس مەملەكەتتىڭ كوشباسشىلارى - قازاقستان پرەزيدەنتى نۇرسۇلتان نازاربايەۆ پەن سينگاپۋردىڭ ءبىرىنشى پرەمەر-ءمينيسترى لي كۋان يۋ قالاعانىن اتاپ ءوتتى.
قازاقستاندىق ديپلوماتتىڭ ايتۋىنشا، ەكى مەملەكەت بارلىق باعىت بويىنشا، اتاپ ايتقاندا قىتايلىق «ءبىر بەلدەۋ - ءبىر جول» باستاماسى اياسىندا ەكىجاقتى قارىم-قاتىناستى بەكەمدەۋدە زور الەۋەتكە يە.
ءوز كەزەگىندە قازاقستانداعى سينگاپۋردىڭ ەلشىسى زۋلكيفلي باحارۋدين قازاقستان قازىرگى تاڭدا سينگاپۋردىڭ ورتالىق ازياداعى ەڭ ءىرى ساۋدا-ەكونوميكالىق سەرىكتەسى بولىپ وتىرعانىن، 2017-جىلى ەكىجاقتى تاۋار اينالىمى 100 ميلليون ا ق ش دوللارىنان اسقانىن اتاپ ءوتتى.
ونىڭ ايتۋىنشا، ەكى ەلدىڭ اراسىندا اۆياحابارلامانىڭ تەزىرەك جولعا قويىلۋى ساۋدا-ەكونوميكالىق قارىم-قاتىناستى دامىتۋدا قوسىمشا سەرپىن بولماق. سونىمەن بىرگە بۇل قادام سينگاپۋردان قازاقستانعا باراتىن تۋريستەردىڭ سانىن ارتتىپ، ەكى حالىقتىڭ دوستىعىن نىعايتۋعا ۇلەس قوسارى ءسوزسىز.
اۆتور: ايان بەكەن ۇلى