استانادا قارۋلى كۇشتەردىڭ 25 جىلدىعىنا ارنالعان عىلىمي كونفەرەنسيا ءوتتى
ءىس-شاراعا ق ر پارلامەنتى ءماجىلىسىنىڭ دەپۋتاتى باقىتبەك سماعۇل، ق ر ق ك باس شتابى باستىعىنىڭ ورىنباسارى گەنەرال-مايور مۇحامەدجان تالاسوۆ، تانىمال وتاندىق جانە شەتەلدىك عالىمدار، مەملەكەتتىك جانە قوعام قايراتكەرلەرى، دوكتورانتتار، ماگيسترانتتار، ستۋدەنتتەر قاتىستى.
كونفەرەنسيانىڭ نەگىزگى ماقساتى قازاقستان رەسپۋبليكاسىنىڭ اسكەري تاريحى، عىلىم مەن ءبىلىمدى دامىتۋ جولدارى مەن كەلەشەگى، اتالمىش سالادا بىرلەسكەن عىلىمي زەرتتەۋلەردى جەتىلدىرۋ ماسەلەلەرىن تالقىلاۋ بولدى.
«بۇگىنگى كونفەرەنسيا «رۋحاني جاڭعىرۋ» باعدارلاماسى شەڭبەرىندە ءوتتى. الاش وردانىڭ 100 جىلدىعى مەن تاۋەلسىز قازاقستاننىڭ قارۋلى كۇشتەرىنىڭ قۇرىلۋىنىڭ 25 جىلدىعىنا ارنالعان جانە ۇرپاق ساباقتاستىعىنداعى الار ورنى وراسان زور. الاش قايراتكەرلەرى وزدەرىنىڭ ومىرلەرىن ەگەمەندى مەملەكەتتى قۇرۋ ىسىنە سارپ ەتتى، ال الاش قوزعالىسى - بۇل حالىققا قىزمەت ەتۋدىڭ جارقىن ۇلگىسى. بۇگىندە ولاردىڭ ارماندارى ورىندالدى. قازاقستاننىڭ اسكەري قىزمەتشىلەرى ومىرلەرىن وتانعا قىزمەت ەتۋگە ارناپ وتىر. ال مۇنداي كونفەرەنسيالار ۇرپاقتار اراسىنداعى بايلانىس ءۇشىن قاجەت. سەبەبى، جاس ۇرپاق ءوزىنىڭ تاريحىن تەرەڭ ءبىلۋى ءتيىس»، - دەپ ق ر ق ك باس شتابى باستىعىنىڭ ورىنباسارى گەنەرال-مايور مۇحامەدجان تالاسوۆ اتاپ ءوتتى.
كونفەرەنسيا بارىسىندا ساياسي عىلىمداردىڭ كانديداتى، الاشتانۋشى، «قاسيەتتى قازاقستان» ولكەتانۋ زەرتتەۋ ورتالىعىنىڭ ديرەكتورى بەرىك ءابدىعالي ۇلىنىڭ «الاش اسكەرى»، اق اسكەر قۇرامىنداعى قازاق بولىكتەرى (1918-1920 ج.ج.) ، تاريح عىلىمدارىنىڭ كانديداتى، دوتسەنت تۇرعانبەك اللانيازوۆتىڭ «قازاقستان كوشپەندىلەرىنىڭ اسكەري ءىسى: زەردەلەۋ تاجىريبەسى مەن ماسەلەلەرى» ، ولكەتانۋشى، قولونەر شەبەرى ءشوپتىباي بايدىلديننىڭ «كەيكى باتىر» اتتى كىتاپتارىنىڭ تۇساۋكەسەرى وتكىزىلدى.