بيىل قازاقستاننىڭ سىرتقى ساۋدا اينالىمى 25 پايىزعا ارتتى

استانا. قازاقپارات - ق ر ۇلتتىق ەكونوميكا مينيسترلىگى بيىلعى جىلداعى ساۋدا سالىسىنداعى كورسەتكىشتەردى جاريالادى، دەپ حابارلايدى قازاقپارات.

«2017-جىلعى قاڭتار-قازانداعى «ساۋدا» سالاسى بويىنشا ناقتى كولەم يندەكسى 103,2 پايىزدى قۇرادى. 2017-جىلعى قاڭتار-قازاندا بولشەك ساۋدا كولەمى 7007,8 ميلليارد تەڭگەنى نەمەسە 2016-جىلعى ءتيىستى كەزەڭ دەڭگەيىمەن سالىستىرعاندا 106,3 پايىزعا جەتتى.

ءدال وسى جىلعى كەزەڭ ىشىندە كوتەرمە ساۋدا كولەمى 15288,4 ميلليارد تەڭگەنى نەمەسە 2016-جىلعى ءتيىستى كەزەڭ دەڭگەيىمەن سالىستىرعاندا 101,7 پايىزدى قامتىدى»، - دەپ اتاپ وتىلگەن مينيسترلىك حابارلاماسىندا.

بەلگىلى بولعانداي، 2017-جىلعى قاڭتار-قىركۇيەكتە سىرتقى ساۋدا اينالىمى 55421,8 ميلليون ا ق ش دوللارىن قۇراپ، 2016-جىلعى قاڭتار-قىركۇيەكپەن سالىستىرعاندا 25,7 پايىزعا جوعارلادى. ونىڭ ىشىندە ەكسپورت - 34460,7 ميلليون ا ق ش دوللارىن (31,4 پايىزعا ءوستى)، يمپورت - 20961,1 ميلليون دوللاردى قۇرادى (17,2 پايىزعا ارتىق).

اۆتور: رۋسلان عابباسوۆ