شىمكەنتتىك شەنەۋنىك 25- مامىردى «سىنىپتاستار كۇنى» دەپ اتاۋدى ۇسىندى
وبلىستىق ەڭبەك ينسپەتسياسى باسقارماسىنىڭ باسشىسى باستار ەسقارايەۆتىڭ سوزىنشە بۇگىندە الەۋمەتتىك جەلىلەردە «سىنىپتاستار» دەگەن قاۋىمداستىق وتە بەلسەندى توپتارعا اينالعان، دەپ حابارلايدى قازاقپارات ح ا ا ءتىلشىسى.
«كەيبىرەۋلەر جاي سىنىپتا بىرگە وقىعانىمەن، باۋىرلاستارىنان دا جاقىن بولىپ كەتەدى. ال، ەندى بىرەۋلەر ايىرىلماس دوستارعا اينالعان. ۇشىنشىلەرى قۇدا-جەكجات بولىپ سىيلاسادى. تاعى ءبىرقاتارى ءبىرىن-ءبىرى ىزدەپ تابا الماي جۇرەدى. سونداي قىزىعى مەن شىجىعى مول بالالىق شاق - بال داۋرەننىڭ ارمانداستار-قۇرداستارىنا ارنايى ءبىر كۇندى اتاۋعا تولىق نەگىز بار دەپ ەسەپتەيمىن»، - دەيدى باستار ەسقارايەۆ.
شەنەۋنىك سونداي-اق قازىرگى تاڭدا مەكتەپتەردە وتەتىن «سوڭعى قوڭىراۋ» كۇنى ءار جىلعى بىتىرگەن تۇلەكتەردىڭ كەزدەسۋى ۇردىسكە اينالىپ وتىرعانىن ايتادى. «ال، 5، 10، 20، 30، 40، 50 جىلدىق سىنىپتاستاردىڭ كەزدەسۋلەرى - بۇگىنگى كۇننىڭ زاڭدىلىقتارى! ياعني، سىنىپتاستار دەگەن «زاڭدى» قاۋىم بار دەگەن ءسوز»، - دەيدى باسقارما باسشىسى.
باستار ەسقارايەۆ بۇل كۇنگە ارناپ «سىنىپتاستارىم» اتتى ءان دە شىعارعان. ءارى بۇل انگە بەينەبايان تۇسىرىلۋدە ەكەن.