قازاقپارات جۋرناليستەرى تاۋەلسىزدىكتىڭ 25 جىلدىعىنا وراي ماراپاتتالدى
باتىس قازاقستان وبلىسىنداعى مەنشىكتى ءتىلشىمىز عايساعالي سەيتاق «ەرەن ەڭبەگى ءۇشىن» مەدالىن، ساراپشى مۇراتبەك ماقۇلبەكوۆ، سارا نۇرعاليەۆا، ق ر پرەزيدەنتى بەكىتكەن مەرەيتويلىق مەدالىن يەلەنسە، دامير بايمانوۆ پەن مارلان جيەمباي «اقپارات سالاسىنىڭ ۇزدىگى» بەلگىسىن الدى.
كەنجەكەي توقتامۇرات قىزى اقپارات جانە كوممۋنيكاتسيا ءمينيسترى داۋرەن ابايەۆتىڭ اتىنان گراموتامەن ماراپاتتالدى.
«ارينە، ولار ماراپاتقا لايىقتى. «قازاقپارات» اگەنتتىگىنىڭ ەڭبەگى كەزەكتى رەت باعالانىپ وتىر. بۇل ءۇشىن قۋانىشتىمىز»، - دەدى قازاقپاراتتىڭ باس ديرەكتورى اسەل تولەگەنوۆا. بيىل پوستكەڭەستىك كەڭىستىكتەگى اقپاراتتىق اگەنتتىككە 96 جىل تولدى. اگەنتتىك 1920-جىلى 13- تامىزدا بۇكىل وداقتىق ورتالىق اتقارۋشى كوميتەت جانىندا رەسەي تەلەگراف اگەنتتىگىنىڭ ورىنبور-تورعاي بولىمشەسى رەتىندە قۇرىلعان.
1921-جىلى قىرعىز (قازاق) ا ك س ر و ا ك بولىمشەسىنىڭ كيرروستا بولىپ قۇرىلعانى تۋرالى قاۋلى قابىلداندى. كەيىننەن اگەنتتىك كازروستا، كازتاسس، ال 1937-جىلى تاسس قۇرامىندا كازتاگ بولىپ وزگەردى. 1997-جىلى «قازاق اقپاراتتىق اگەنتتىگى» بولىپ قۇرىلدى. 2002جىلى قاراشادا اگەنتتىك بازاسىندا «قازاق اقپاراتتىق اگەنتتىگى» ۇلتتىق كومپانياسى» اكسيونەرلىك قوعامى قۇرىلدى.
2014-جىلعى قاڭتاردان باستاپ «قازاقپارات» حالىقارالىق اقپاراتتىق اگەنتتىگى» ج ش س رەتىندە قىزمەت ەتۋدە.