شەتەلدىك ينۆەستورلار ەلباسىنا 25 مىڭ تال گوللاند قىزعالداعىنىڭ سەرتيفيكاتىن تابىس ەتتى
ەسكە سالا كەتسەك، ەلباسى نۇرسۇلتان نازاربايەۆ حالىقارالىق مۇناي-گاز كومپانيالارىنىڭ باسشىلارىمەن كەزدەستى.
«ExxonMobil» كومپانياسىنىڭ پرەزيدەنتى د. ۆۋدس، «Total E&P» كومپانياسىنىڭ پرەزيدەنتى ا. برەياك، «Royal Dutch Shell» كومپانياسىنىڭ باس اتقارۋشى ديرەكتورى ب. ۆان بەردەن جانە «Eni» كومپانياسىنىڭ بارلاۋ جانە ءوندىرۋ جونىندەگى باس ديرەكتورى ا. ۆەللا قاتىسقان كەزدەسۋدە قازاقستاننىڭ مۇناي-گاز سالاسىنداعى ارىپتەستىكتى دامىتۋ ماسەلەلەرى تالقىلاندى.
«ExxonMobil», «Total E&P», «Royal Dutch Shell» جانە «Eni»كومپانيالارىنىڭ باسشىلارى رەسپۋبليكادا قولايلى ينۆەستيتسيالىق جاعداي جاسالعانى ءۇشىن قازاقستان پرەزيدەنتىنە العىس ايتىپ، تاۋەلسىزدىك مەرەيتويىنىڭ قۇرمەتىنە وراي مۇناي قۇيىلعان سيمۆولدىق ساۋىت، سونداي-اق 25 مىڭ تال گوللاند قىزعالداعىنا ارنالعان سەرتيفيكات تابىس ەتتى.
سونداي-اق، قىزعالداقتىڭ «نازاربايەۆ» دەپ اتالاتىن ءتۇرىنىڭ 8 مىڭىن گوللانديالىق گۇل وسىرۋشىلەر سۇرىپتاپ شىعارعان، دەپ حابارلايدى «حابار» اگەنتتىگى.
قالعان 7 مىڭى - «قازاقستان»، 10 مىڭى - گوللانديالىق قىزعالداقتار. بۇل سىيلىقتى ««Royal Dutch Shell» كومپانياسىنىڭ اتقارۋشى ديرەكتورى ۇسىندى. شەلل - الەمدەگى ءىرى كومپانيالاردىڭ، ال قازاقستانداعى ءىرى ينۆەستورلاردىڭ ءبىرى.
«بۇل - ەرەكشە كۇن. قازاقستان تاۋەلسىزدىگىنىڭ 25 جىلدىعى قارساڭىنداعى كۇن بولعاندىقتان دا شىعار. مەن ەلباسىمەن العاش رەت كەزدەسكەندە ءبىز ول كىسىگە قىزعالداقتىڭ «نازاربايەۆ» دەپ اتالاتىن ءتۇرىن ۇسىنعان بولاتىنبىز. ۇلتتارىمىزدىڭ اراسىنداعى سىيلاستىق پەن سۇيىسپەنشىلىكتىڭ بەلگىسى رەتىندە، بۇل جولى مەن قىزعالداقتىڭ 25 مىڭ تالىن الىپ كەلدىم، ولار استانادا ەگىلەتىن بولادى»، - دەدى Royal Dutch Shell كومپانياسىنىڭ اتقارۋشى ديرەكتورى بەن ۆان بەردەن.