اپتاسىنا ەكى رەت - بەيسەنبى جانە جۇما كۇندەرى ساعات 12:00-دەن 15:00 گە دەيىن ەلوردالىق جۇمىسپەن قامتۋ ورتالىعىنىڭ ماماندارى كەلۋشىلەرگە جۇمىس تابۋعا كومەكتەسەتىن بولادى، دەپ حابارلايدى قازاقپارات.
وسى ۋاقىتقا دەيىن جۇمىسپەن قامتۋ ورتالىعىنىڭ قىزمەتكەرلەرىنە 200 دەن اسا ادام جۇگىنگەن، سونىڭ 25 ءى ماماندىقتارى بويىنشا جۇمىسقا تۇرۋعا جولداما الدى. «جولدامامەن بىردەن جۇمىس بەرۋشىگە بارعان دۇرىس. كوبىنەسە جۇمىسسىزدار ەكىنشى، ءۇشىنشى كۇندەرى بارىپ، بوس جۇمىس ورنىنان ايىرىلىپ قالادى. بۇگىن ماعان 15 ادام كومەك سۇراپ كەلدى، بەسەۋى جولداما الدى» ، - دەيدى «ازىرەت سۇلتان» مەشىتىندە جۇمىس جۇرگىزىپ جاتقان جۇمىسپەن قامتۋ ورتالىعىنىڭ مامانى قانات جۇمابايەۆ. ونىڭ ايتۋىنشا، وسى كۇنگە دەيىن ەڭبەك نارىعىندا ەلەكتريك، سلەسار، دانەكەرلەۋشى سياقتى تەحنيكالىق ماماندىقتارعا سۇرانىس جوعارى. جۇمىسپەن قامتۋ ورتالىعىنىڭ مالىمەتتەر بازاسىندا وزەكتى بوس جۇمىس ورىندارىن ۇسىنۋمەن اينالىساتىن ءموبيلدى توپتار مەشىتتەردەن باسقا ورتالىق بازاردا، «شانحاي» بازارىندا جۇمىس ىستەيدى.