ا. دوسقاليەۆانى ولتىرگەن تۇرعىن 25 جىلعا سوتتالدى
ب ق و سوتىنىڭ باسپا ءسوز قىزمەتىنەن تۇسكەن مالىمەتكە قاراعاندا، جولاۋشى تاسىمالداۋمەن اينالىسقان ب. حاسانعاليەۆ بيىلعى 14 - تامىزدا ورال- اتىراۋ تاس جولىنىڭ سەرەبرياكوۆ كەنتى تۇسىندا زەلەنوۆ اۋدانى شاپوۆ اۋىلىنداعى ۇيىنە بارماقشى بولىپ، كولىك كۇتىپ تۇرعان بەيتانىس ايدانا دوسقاليەۆانى ءوزىنىڭ «ۆاز-2106» اۆتوكولىگىنە وتىرعىزعان.
جولشىباي ول ايداناعا دەمالىپ قايتۋدى ۇسىنىپ، كوشىم ارناسىنىڭ جاعاسىنا بەت العان. سول جەردە حاسانعاليەۆ زورلاۋ ماقساتىندا قىزعا تيىسكەن. قارسىلىق بىلدىرگەن ونى ۇرىپ-سوعىپ، زورلاعان. سوسىن جاساعان قىلمىسىن جاسىرۋ ماقساتىندا دوسقاليەۆانى تۇنشىقتىرىپ ءولتىرىپ، دەنەسىن سۋعا لاقتىرىپ، ءوزى وقيعا ورنىنان بوي تاسالاعان.
ايتا كەتەيىك، ب. حاسانعاليەۆ بۇدان بۇرىن بىرنەشە رەت، سونىڭ ىشىندە 2013 - جىلى ۇرلىعى ءۇشىن سوتتالعان. وعان قوسا 2013 - جىلى قىز زورلاماق بولعانى ءۇشىن ۇستالعان، الايدا تەرگەۋشىلەر بۇل ءىستى اياعىنا دەيىن جەتكىزبەگەن.
ەگەر ونىڭ قىلمىستىق ءىس-ارەكەتى سول كەزدە دالەلدەنىپ، جازاسىن العان كەزدە ايدانا ولمەگەن بولار ما ەدى. سونىمەن قاتار ۇرلىعى ءۇشىن سوتتالىپ، بوستاندىعى شەكتەلگەن حاسانعاليەۆ كەشكى 22.00 دەن كەيىن ۇيىنەن شىقپاۋى جانە ءتيىستى ورگانعا حابارلاماي، مەكەنجايىنان كەتپەۋى ءتيىس بولاتىن.
الايدا ول باقىلاۋدىڭ جەتكىلىكسىزدىگىنەن باسقا جاققا، ءتىپتى استاناعا دەيىن ەمىن-ەركىن بارىپ-كەلىپ جۇرگەن. وسىعان وراي سوت وبلىستىق ىشكى ىستەر دەپارتامەنتى مەن وبلىستىق قىلمىستىق-اتقارۋ جۇيەسى دەپارتامەنتتەرى اتىنا جەكە قاۋلى شىعاردى.
اۋىلداستارىنىڭ ايتۋىنشا، قاراپايىم وتباسىدان شىققان 25 جاسار ايدانا بازاردا ساتۋشى بولىپ، اتا-اناسىنا كومەكتەسىپ، ءناپاقا ايىرعان. سۇيگەن جىگىتىمەن كەلىسىپ، تۇرمىسقا شىققالى جۇرگەن جاس كوپ ارمانىنا جەتە الماي، قانىپەزەردىڭ قولىنان وسىلايشا قازاعا ۇشىرادى.
اۆتور: ەلجان ەرالى