ەلوردادا 250 دەن استام ءسابي شالا تۋعان

استانا. قازاقپارات - ەلوردالىق نەوناتولوگتار ءۇشىن يزرايلدىڭ الدىڭعى قاتارلى ەمحانالارىمەن ستراتەگيالىق ىنتىماقتاستىق اياسىندا «تىم از سالماقپەن تۋعان بالالاردى كۇتۋدىڭ ءتيىمدى تەحنولوگيالارى» شەبەرلىك ساباعى ۇيىمداستىرىلدى، دەپ حابارلايدى قازاقپارات ءتىلشىسى.

ەلوردانىڭ 30 نەوناتولوگىنا وزات نەوناتولوگ مامان، مەديتسينا عىلىمدارىنىڭ دوكتورى، «شنايدەر» ۇلتتىق بالالار مەديتسينالىق ورتالىعىنىڭ ينتەنسيۆتىك تەراپيا ءبولىمىنىڭ مەڭگەرۋشىسى ميحاەليا وسوۆسكي ساباق ءوتتى.

«جىل باسىنان بەرى حيرۋرگيا، ۋرولوگيا، ەندوسكوپيا، شۇعىل مەديتسينالىق جاردەم باعىتتارى بويىنشا 5 مىڭنان استام قىزمەتكەر بىلىكتىلىگىن اتتىردى»، - دەيدى استانا قالاسى قوعامدىق دەنساۋلىقتى ساقتاۋ باسقارماسىنىڭ انا مەن بالا ءبولىمىنىڭ باسشىسى ساۋلە مۇقىشەۆا.

استانا قالالىق دەنساۋلىق ساقتاۋ باسقارماسىنىڭ مالىمەتىنشە، ۇستىمىزدەگى جىلدىڭ 9 ايىندا 259 بالا شالا تۋعان.

«ءبىز قولدانىپ وتىرعان شەتەلدىك تاجىريبە مەن وزات تەحنولوگيالار قازاقستاندا نارەستەلەر اۋرۋلارىنىڭ الدىن الىپ، شەتىنەۋىن ازايتادى دەپ سەنەمىن. كەيدە، ءتىپتى ارنايى مەديتسينالىق تەحنيكالار مەن ءدارى-دارمەكتەردى الۋعا بولىنگەن ازىن-اۋلاق ينۆەستيتسيا دا جاعدايدى وڭالتۋعا وڭ ىقپال ەتەدى»، - دەيدى ميحاەل وسوۆسكي.

ونىڭ ايتۋىنشا، شەتەلدىك ماماندار ەلوردالىق دارىگەرلەرمەن دە تاجىريبە الماسقان. «جەرگىلىكتى دارىگەرلەردىڭ جۇمىسىن كورىپ تاڭ قالدىم، كەيبىر ءدارى-دارمەكتەر مەن قوندىرعىلار بولماسا دا، ولار بالالاردىڭ ءومىرىن ساقتاپ قالۋدا»، - دەيدى ول.

بۇدان تىس، «MVI» مەديتسينا ورتالىعىنىڭ باس ديرەكتورى ناتاليا مەلەحتىڭ ايتۋىنشا، استانانىڭ ارىپتەستەردى وقىتاتىن ورتالىققا اينالاتىنداي الەۋەتى جەتكىلىكتى.