الماتى وبلىسىندا تاۋەلسىزدىكتىڭ 25 جىلدىعىنا وراي «25 جۇلدىزدى كۇن» شاراسى وتەدى
ايماقتا مەرەيتويلىق داتانى كەڭ كولەمدە اتاپ ءوتۋدىڭ كەشەندى جوسپارى ازىرلەندى. مەرەكەنىڭ نەگىزگى باعدارلاماسىنا قوسىمشا ايتۋلى كۇنگە ايشىقتى رەڭك بەرەتىن 25 ءىرى شارا وبلىس تۇرعىندارىنا ەرەكشە سىي بولماق. «25 جۇلدىزدى كۇن» 21- قاراشادان باستالىپ، 15- جەلتوقسانعا دەيىن جالعاسادى، دەپ حابارلايدى قازاقپارات ءتىلشىسى.
وبلىستىق ىشكى ساياسات باسقارماسىنىڭ باسشىسى رۋستام الپىسبايەۆتىڭ ايتۋىنشا، مەرەيتويلىق شارالار الەۋمەتتىك-ەكونوميكالىق دامۋدىڭ بارلىق سالالارىن قامتيدى. اتاپ ايتقاندا، جۇلدىزدى كۇندەر اياسىندا زاماناۋي كاسىپورىنداردىڭ اشىلۋى، جاڭا جۇمىس ورىندارىنىڭ قۇرىلۋى، ءتۇرلى قايىرىمدىلىق شارالارى، تۇرعىن ۇيلەردى جانە باسقا دا الەۋمەتتىك ماڭىزدى نىسانداردى پايدالانۋعا بەرۋ، سپورتتىق جارىستار، كىتاپتاردىڭ، دەرەكتى فيلمدەردىڭ تۇساۋكەسەرلەرى جانە باسقا دا شارالار بار.
- «25 جۇلدىزدى كۇننىڭ» اسا ءىرى وقيعاسىنىڭ ءبىرى رەتىندە ءبىر كۇندە 25 بالاباقشانىڭ قاتار اشىلۋىن اتاپ وتۋگە بولادى. ولاردىڭ بارلىعى دا مەملەكەتتىك-جەكەمەنشىك سەرىكتەستىك نەگىزىندە سالىنعان.
تاعى ءبىر ماڭىزدى شارا - وبلىستىڭ 25 ەلدى مەكەنىنە كوشپەلى «سكرينينگ» شىعىپ، مەديتسينالىق قىزمەت كورسەتەتىن بولادى.
وبلىستىڭ 75 ەلدى مەكەنىن قامتيتىن «جىبەك جولى» قايىرىمدىلىق شاراسى دا ەرەكشە بولماق. اكسيا اياسىندا ءسۇيىنباي اتىنداعى وبلىستىق فيلارمونيا مەن بيكەن ريموۆا اتىنداعى دراما تەاترىنىڭ، «تالدىقورعان اۋەندەرى» ءانسامبلىنىڭ ارتىستەرى گاسترولدىك ساپارعا شىعادى، - دەيدى رۋستام الپىسبايەۆ.
الماتى وبلىسى اكىمىنىڭ باسپا ءسوز قىزمەتىنىڭ حابارلاۋىنشا، مەرەيتوي قارساڭىندا جاڭا پاتەر كىلتتەرىن سالتاناتتى جاعدايدا تابىستاۋ شارالارى دا ۇيىمداستىرىلىپ، تالدىقورعان قالاسىندا 168 پاتەرلى جالدامالى ءۇي پايدالانۋعا بەرىلسە، تالعار قالاسىندا جاڭا 64 پاتەردىڭ يەسى قۋانىشقا كەنەلمەك.
«تالدىقورعان - باق قالا» اكسياسىنىڭ جالعاسى رەتىندە وبلىس ورتالىعىندا 25 مىڭ ءتۇپ اعاش وتىرعىزىلادى. تالانتتى جاستار 25 كۇي ورىنداپ، ءبىر مەزەتتە 25 تاقتادا شاحمات وينالادى.
سونىمەن قاتار قاراساي، قاراتال، كەربۇلاق اۋداندارىندا 3 مەكتەپ اشىلسا، عارىشكەر ايدىن ايىمبەتوۆپەن «جۇلدىزدى گيد» شاراسى وتكىزىلەدى.
ايتا كەتەيىك، اتالعان «جۇلدىزدى گيد» شاراسى اياسىندا تالدىقورعاندا جاڭادان اشىلعان وقۋشىلار سارايىندا ورناتىلعان تەلەسكوپپەن ايدىن ايىمبەتوۆ جاس ورەندەرگە جۇلدىزداردى تاماشالاتىپ، ولاردىڭ ەرەكشەلىكتەرى تۋرالى تۇسىندىرەدى.