تاۋەلسىزدىكتىڭ 25 جىلدىعى: قازاق گەوگرافيالىق قوعامى 108 كۇننىڭ ىشىندە قازاقستاننىڭ بارلىق ايماقتارىن ارالاپ شىعادى
بۇل تۋرالى اتالعان قوعامنىڭ فەيسبۋكتەگى پاراقشاسىندا حابارلاندى.
«قازاقستان تاۋەلسىزدىگىنىڭ 25 جىلدىعىنا جانە تۇڭعىش قازاق گەوگرافى ءاليحان بوكەيحاننىڭ 150 جىلدىعىنا ارنالعان ەكسپەديتسيا ءوز باستاۋىن ەلىمىزدىڭ ەكى نەگىزگى قالالارىنان الادى. استانا كۇنى، 6 -شىلدەدە، ەكسپەديتسيا جولعا شىعىپ، 108 كۇننىڭ ىشىندە قازاقستاننىڭ بارلىق ايماقتارىن ارالاپ، ەلورداعا قايتىپ ورالادى. 108 دەپ - تەكتەن-تەككە الىپ تۇرعانىمىز جوق! ويتكەنى ءبىز 108 ساعاتتىڭ ىشىندە وڭتۇستىك پوليۋستى دە باعىندىرىپ، گيننەستىڭ رەكوردتار كىتابىنا ەنگەندىكتەن، وسى ساننىڭ ەرەكشەلىگىن جالعاستىرماقپىز!
ءبىز استانادان اقتوعايعا، سودان كەيىن قارقارالىعا جانە سەمەيگە بارامىز. سەمەي قالاسىندا ەكسپەديتسيا ەكى باعدار بويىنشا ءبولىنىپ كەتەدى. ءبىرىنشى توپ الماتى وبلىسىنا بارىپ، سول جاقتان بۇكىل قازاقستان ارقىلى وتسە، ەكىنشى باعىت ءاليحان بوكەيحاننىڭ 150 جىلدىعىن اتاپ ءوتۋ ماقساتىندا ومبىعا بارىپ، سانكت-پەتەربۋرگ، مينسك، سامارا، ورىنبور، ماسكەۋ ارقىلى ءجۇرىپ وتەدى. كەيىن ەكى باعىت استانادا تاعى دا بىرگە كەزدەسپەك»، دەلىنگەن حابارلامادا.
جوبانى قازاق گەوگرافيالىق قوعامى، حابار تەلەارناسى جانە ارشا مەديا ۇيىمداستىرىپ وتىر.