تۇركيا اقپارات قۇرالدارى سۋ-24 ۇشاعىنا جاسالعان ەسكەرتۋدىڭ دىبىس جازباسىن جاريالادى
10:33, 26 - قاراشا 2015
استانا. قازاقپارات - تۇركيالىق اقپارات قۇرالدارى رەسەيلىك سۋ-24 ۇشاعىنا جاسالعان ەسكەرتۋدىڭ اۋديو (دىبىس) جازباسىن جاريالادى، - دەپ حابارلايدى "The First News" اقپاراتتىق اگەنتتىگى Haberler.com سايتىنا سىلتەمە جاساپ.
اۋديوجازبادا F-16 جويعىشىنىڭ ۇشقىشى اعىلشىن تىلىندە ەسكەرتۋ جاساعانى جازىلعان: «سىزدەر تۇركيا اۋە كەڭىستىگىنە جاقىنداپ كەلە جاتسىزدار. باعىتتارىڭىزدى دەرەۋ وڭتۇستىككە وزگەرتىڭىزدەر».
بۇعان دەيىن تۇركيانىڭ باس شتابى رەسەيلىك بومبالاۋشىنىڭ جويىلعانعا دەيىن تۇركيالىق تاراپتان 10 رەت ەسكەرتۋ العانىن حابارلاعان ەدى. سۋ-24 ۇشاعى تۇركيا شەكاراسىنىڭ اۋە كەڭىستىگىن بۇزۋعا 15 ميل (24,1 شاقىرىم) قالعاندا العاشقى ەسكەرتۋدى العان. باسىلىمنىڭ مالىمەتىنشە، ەسكەرتۋ ءار 2 ميل (3,2 شاقىرىم) سايىن جاسالىپتى، دەگەنمەن ۇشقىشتار ونى ەلەمەگەن.
ەسكە سالا كەتەيىك، تۇركيانىڭ اۋە كۇشتەرى سيريامەن شەكارالاس ايماقتا بەلگىسىز اسكەري ۇشاقتى اتىپ تۇسىرگەن بولاتىن. كەيىن ونىڭ رەسەيلىك سۋ-24 ەكەنى انىقتالدى. ۇشقىشتاردىڭ ءبىرىنىڭ قازا تاپقانى بەلگىلى بولدى.
tengrinews.kz