بۇل تۋرالى اقوردادا مەديتسينا قىزمەتكەرلەرى كۇنى قارساڭىندا ق ر مەملەكەتتىك حاتشىسى گۇلشارا ابدىقالىقوۆامەن كەزدەسۋ الدىندا «انا مەن بالا» ۇ ع و بۇيرەك ورتالىعىنىڭ جەتەكشىسى شولپان التىنوۆا ءمالىم ەتتى.
«جالپى قازاقستاندا العاش رەت بالانىڭ بۇيرەگى 1997 - جىلى ا. سىزعانوۆ اتىنداعى ۇلتتىق عىلىمي حيرۋرگيالىق ورتالىعىندا الماستىرىلعان بولاتىن. سودان كەيىن بۇيرەك الماستىرۋ وپەراتسيالارى جاسالىپ تۇردى. جىل سايىن سوزىلمالى بۇيرەك جەتىسپەۋشىلىگى ناۋقاسىنا شالدىققان جەتكىنشەكتەردىڭ سانى كوبەيىپ كەتتى. ولار شەتەلگە بارعانىمەن ءتيىستى ناتيجە بولمادى. وسى ماسەلەلەردىڭ بارلىعىن ەسكەرىپ، ءبىز ءبىر توپ ماماندى مەديتسيناسى وزىق دامىعان ەلدەرگە وقىتۋعا جىبەرىپ، بىلىكتىلىگىن شىڭدادىق. وسى ورايدا 2012 -جىلى انا مەن بالا ورتالىعىندا ءۇش جاسار بالاعا بۇيرەك الماستىردىق. وسى باعىتتا سالماعى 10 كەلى بالادان باستادىق. سودان بەرى 24 بالانىڭ بۇيرەگىن اۋىستىردىق. بۇل تۇرعىدا وڭ ناتيجە بار جانە قازىرگى كەزدە وسى بالالار مەكتەپتە، جوعارى وقۋ ورىندارىندا ءبىلىم الۋدا»، - دەدى ش. التىنوۆا.
وسى ورايدا ول 2014 - جىلى بالالار ترانسپلانتاتسياسىن دامىتۋ ماقساتىندا باۋىر اۋىستىرۋ وپەراتسيالارى باستالعانىن ەسكە سالىپ ءوتتى. بۇگىنگى ۋاقىتقا دەيىن ەكى بالانىڭ باۋىرى اۋىستىرىلعان ەكەن.
«قازىر قازاقستاندا 3 مىڭعا جۋىق ناۋقاس بۇيرەك اۋىستىرۋ وپەراتسياسىن كۇتىپ وتىر. سونىڭ ىشىندە 37 بالا بار جانە ونىڭ 24 ءى بۇگىندە شۇعىل تۇردە بۇيرەك اۋىستىرۋ وپەراتسياسى تىزىمىندە تۇر. الايدا دونور تاپشىلىعى بارشا الەمدە پروبلەما. ەرەسەكتەرگە قاراعاندا بالالاردىڭ ەرەكشەلىگىنە توقتالساق، ولارعا اتا- انالارى دونور بولا الادى. 24 بالانىڭ 21 ىنە اتا- انالارى دونور بولسا، ال ءۇش بالاعا مايىتتەن بۇيرەك الماستىرىلادى»، - دەدى بۇيرەك ورتالىعىنىڭ جەتەكشىسى.
اۆتور : رۋسلان عابباسوۆ