ازاپتاۋ مەن وكىلەتتىگىن اسىرا پايدالانۋ بويىنشا 243 قىلمىستىق ءىس تەرگەلىپ جاتىر - باس پروكۋرور

نۇر-سۇلتان. قازاقپارات - قاڭتار وقيعاسى بويىنشا قانشا قۇقىق قورعاۋ ورگانىنىڭ وكىلى قىزمەتتەن شەتتەتىلدى؟

دەپۋتات بەرىك دۇيسەنبينوۆ ءماجىلىستىڭ جالپى وتىرىسىندا باس پروكۋراتۋرا مەن ىشكى ىستەر مينيسترلىگىنىڭ باسشىلارىنا وسىنداي ساۋال قويدى، دەپ حابارلايدى قازاقپارات ءتىلشىسى.

«قاڭتار وقيعاسىنان كەيىن ادام ازاپتاۋ مەن وكىلەتتىگىن اسىرا پايدالانۋ فاكتىلەرى بويىنشا 243 قىلمىستىق ءىس تەرگەلىپ جاتىر دەپ ادام قۇقىقتارى جونىندەگى ۋاكىل اقپارات بەردى. وسى 243 قىلمىستىق ءىس بويىنشا قانشا لاۋازىمدى ادام جۇمىستان شەتتەتىلدى؟»، - دەپ سۇرادى دەپۋتات.

«243 ءىس تەرگەلىپ جاتىر. ونىڭ ىشىندە ەڭ كۇردەلى 9 ءىستى باس پروكۋراتۋراعا الدىق. 9 ادام قاماۋعا الىندى. ونىڭ ىشىندە 8 ى ۇلتتىق قاۋىپسىزدىك ورگانىنىڭ، 1 ادام پوليتسيا قىزمەتكەرى. بۇل ءىستىڭ ءبارى ءالى سوتقا جولدانعان جوق. ءالى شەشىم قابىلدانعان جوق»، - دەدى باس پروكۋرور بەرىك اسىلوۆ.

ىشكى ىستەر ءمينيسترى مارات احمەتجانوۆ تا قوسىمشا اقپارات بەردى.

«ءبىزدىڭ ءبىر قىزمەتكەر قازىر قاماقتا. ول الماتى وبلىسىنىڭ قىزمەتكەرى. سول جەردە دەپارتامەنتتىڭ باستىعى، بۇكىل ورىنباسارلارى جۇمىستان بوساتىلعان. قالعاندارىنا تەرگەۋ ناتيجەسى بويىنشا قورىتىندى شارالار قولدانىلادى»، - دەدى مينيستر.

اۆتور: ەسىمجان ناقتىباي