بۇل تۋرالى مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتى ءتوراعاسىنىڭ ورىنباسارى ايگۇل بەكتەنوۆا ورتالىق كوممۋنيكاتسيالار قىزمەتىندە وتكەن بريفينگىدە ءمالىم ەتتى.
«9-14- ءساۋىر ارالىعىندا استاناداعى جاقسىلىق ۇشكەمپىروۆ اتىنداعى «جەكپە-جەك» سارايىندا كۇرەس تۇرلەرىنەن وسىمەن 36-ازيا چەمپيوناتى وتپەك. بۇل جارىسقا ازيا قۇرلىعىنىڭ 24 مەملەكەتىنەن 300 گە جۋىق سپورتشىنىڭ قاتىسۋى جوسپارلانىپ وتىر. ولاردىڭ اراسىندا وليمپيادا ويىندارىنىڭ 7 جۇلدەگەرى، الەم چەميپيوناتتارىنىڭ 5 جەڭىمپازى قاتىسادى. سوندىقتان، ءدۇبىرلى دودا بولايىن دەپ تۇر. نەگىزى بۇل - ازيا چەمپيوناتى، ليتسەنزيالىق تۋرنير ەمەس. ءبىراق، ازيا ويىندارىنىڭ الدىنداعى، الەم چەمپيوناتىنىڭ الدىنداعى نەگىزگى جارىستاردىڭ ءبىرى بولىپ ەسەپتەلەدى»، - دەدى كوميتەت وكىلى.