«ۇكىمەت 11- قاڭتاردا ەل اۋماعىنا 2022 -جىلعى 1- قىركۇيەككە دەيىن اكەلىنگەن كولىك قۇرالدارىنىڭ جەكەلەگەن ساناتتارىن باستاپقى تىركەگەنى ءۇشىن الىم مولشەرلەمەسىن قولدانۋدىڭ جانە وسىنداي كولىك قۇرالدارىن اكەلۋدى جۇزەگە اسىرعان جەكە تۇلعالاردى وندىرۋشىلەردىڭ كەڭەيتىلگەن مىندەتتەمەلەرىنەن بوساتۋدىڭ قاعيدالارىن بەكىتتى. ەرەجەلەر العاشقى رەسمي جاريالانعان كۇننەن كەيىن كۇنتىزبەلىك ون كۇن وتكەن سوڭ قولدانىسقا ەنگىزىلەدى. ياعني، ەرەجەلەردىڭ بۇگىن جاريالانعانىن ەسكەرە وتىرىپ، ولار 2023 -جىلدىڭ 23- قاڭتارىندا، دۇيسەنبىدەن كۇشىنە ەنەدى جانە سول كۇننەن باستاپ ءبىز شەتەلدىك اۆتوكولىكتەردى زاڭداستىرۋعا كىرىسەمىز»، - دەدى يگور لەپەحا.
ونىڭ ايتۋىنشا، ەنگىزىلگەن ءتيىستى وزگەرىستەرگە سايكەس، زاڭداستىرىلاتىن كولىكتەردىڭ يەلەرى ۋتيليزاتسيالىق الىم تولەمەيدى.
«زاڭداستىرۋ كەزىندە ۋتيليزاتسيالىق الىم تالاپ ەتىلمەيدى. كولىك يەلەرى تەك 200000 تەڭگە مولشەرىندەگى ءبىر رەتتىك تولەم جاسايدى. بۇل جۇمىستار ۇكىمەت بەكىتكەن ءتيىستى قاعيدالار مەن تالاپتارعا ساي جۇرگىزىلەدى. بىرىنشىدەن، كولىك 2022 -جىلدىڭ 1- قىركۇيەگىنە دەيىن ەلگە اكەلىنۋى كەرەك. ەكىنشىدەن، ول ىزدەۋدە بولماۋى ءتيىس. ۇشىنشىدەن، باسقا مەملەكەتتە بۇرىنعى تىركەلگەن جەرى بويىنشا ەسەپتەن شىعارىلۋى قاجەت. سوڭعىسى - كەدەندىك تەكسەرۋدەن ءوتۋى كەرەك»، - دەپ ءتۇسىندىردى ىشكى ىستەر ءمينيسترىنىڭ ورىنباسارى.
اۆتور
ءاليحان اسقار