ەلىمىزدە رەسەيمەن بىرگە قۇنى 23 ميلليارد دوللار بولاتىن 84 ءىرى جوبا ىسكە اسىرىلۋدا
تاراپتار ساۋدا- ەكونوميكالىق ىنتىماقتاستىق ماسەلەلەرىنىڭ كەڭ اۋقىمىن، ترانزيتتىك جانە ەكىجاقتى جۇك تاسىمالداۋ كولەمىن ۇلعايتۋ جونىندەگى شارالاردى، شەكارالىق وتكىزۋ پۋنكتتەرىن جاڭعىرتۋ جونىندەگى جوسپارلاردى جانە باسقا دا ءبىرقاتار تاقىرىپتاردى تالقىلادى.
ءاليحان سمايىلوۆ ق ر مەن ر ف اراسىندا ەكونوميكالىق كووپەراتسيا قارقىندى دامىپ، ءوزارا ساۋدا- ساتتىق دەڭگەيى ارتا تۇسكەنىن جانە بىرلەسكەن جوبالار ىسكە اسىرىلىپ جاتقانىن ايتتى. بۇل رەتتە ەكى ەل كوشباسشىلارى اراسىنداعى بەلسەندى ساياسي ديالوگتىڭ قازاقستان- رەسەي ارىپتەستىگىنىڭ بارلىق سالالارىندا جوعارى قارقىندى قامتاماسىز ەتىپ وتىرعانى اتاپ ءوتىلدى.
وتكەن جىلدىڭ 11 ايىندا ءوزارا تاۋار اينالىمى 2021 -جىلدىڭ سايكەس كەزەڭىمەن سالىستىرعاندا ايتارلىقتاي وسكەن.
ونەركاسىپتىك كووپەراتسيانىڭ دامۋ قارقىنى جاقسى، ونىڭ اياسىندا جالپى قۇنى $1 ميللياردقا جۋىق 26 بىرلەسكەن جوبا ىسكە اسىرىلدى.
بۇعان قوسا قۇنى شامامەن $23 ميلليارد بولاتىن 84 ءىرى جوبا ىسكە اسىرىلۋدا جانە پىسىقتالۋ ساتىسىندا. وسى جوبالاردىڭ اياسىندا 24 مىڭ جۇمىس ورنى قۇرىلادى دەپ كۇتىلۋدە.
«بۇل قازاقستان- رەسەي ىنتىماقتاستىعىنىڭ زور الەۋەتىن كورسەتەدى، ءبىز ونى بەلسەندى تۇردە قولداپ، دامىتۋىمىز قاجەت»، - دەدى ءاليحان سمايىلوۆ.
ءوز تاراپىنان ميحايل ميشۋستين ەكى ەل ۇكىمەتتەرى تۇراقتى بايلانىستا ەكەنىن جانە ءوزارا مەملەكەتارالىق بايلانىستاردىڭ اسا ماڭىزدى مىندەتتەرىن ۋاقىتىلى شەشىپ وتىرعانىن اتاپ ءوتتى.
«نەگىزگى باسىمدىقتارىمىزدىڭ ءبىرى - قازاقستانمەن قارىم- قاتىناستى ءارى قاراي نىعايتا ءتۇسۋ. ءبىزدىڭ ىنتىماقتاستىعىمىز دوستىق، ستراتەگيالىق سەرىكتەستىك جانە وداقتاستىق پرينتسيپتەرىنە نەگىزدەلگەن. ەكى ەل اراسىندا ءوزارا ساۋدا- ساتتىق تابىستى دامىپ كەلەدى. بۇل رەتتە ءبىز ونەركاسىپ، ماشينا جاساۋ، ەنەرگەتيكا، كولىك جانە باسقا دا سالالاردا جاڭا وندىرىستىك تىزبەكتەر قۇرۋدى جەدەلدەتۋ ماڭىزدى دەپ سانايمىز»،- دەدى ميحايل ميشۋستين.
بۇعان دەيىن الماتىدا ەۋرازيالىق ۇكىمەتارالىق كەڭەستىڭ شاعىن قۇرامداعى وتىرىسى ءوتىپ جاتقانى تۋرالى جازعان بولاتىنبىز.