الداعى بەس جىلدا وڭتۇستىكتەن سولتۇستىك وبلىستارىنا 22 مىڭنان استام وتباسىنى كوشىرۋ جوسپارلانعان

شىمكەنت. قازاقپارات - «تۇرعىن ءۇي قۇرىلىس جيناق بانكى» وڭتۇستىكتەن سولتۇستىككە كوشەتىندەر ءۇشىن جەڭىلدىكتەر جاساۋدا.

اتالعان بانك قونىس اۋداراتىندارعا ءۇي قۇنىنىڭ ەلۋ پايىزىن جيناماي- اق، باسپانا بەرەتىن بولدى. بۇل تۋرالى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ ماماندارى مالىمدەپ وتىر، دەپ حابارلايدى قازاقپارات ءتىلشىسى.

سالا ماماندارىنىڭ سوزىنشە، وتباسىمەن بىرگە سولتۇستىككە كوشۋدى جوسپارلاعاندار ءۇشىن مەملەكەتتەن قوماقتى جاردەماقى دا بەرىلەدى. ستاتيستيكاعا سۇيەنسەك، سوڭعى ءۇش جىلدا ءوڭىر حالقى 272 مىڭ ادامعا ارتقان. ماقتارال، سارىاعاش اۋداندارىنداعى بۇل كورسەتكىش 100 مىڭ ادامنان اسادى. وسى ستاتيستيكانى تومەندەتۋ ءۇشىن الداعى بەس جىلدا وڭىرىمىزدەن 22 مىڭنان استام وتباسىن سولتۇستىك وبلىستارعا قونىستاندىرۋ جوسپارلانىپ وتىر ەكەن. جالپى، بۇل باعدارلاما قولعا الىنعالى بەرى وڭتۇستىك وڭىرلەردەن سولتۇستىككە 58 مىڭ 904 وتباسى قونىس اۋدارسا، سونىڭ 40 پايىزى وڭتۇستىكتىڭ تۇرعىندارى ەكەن. ياعني، جوبانى جۇزەگە اسىرۋدا بىزدەگى بەلسەندىلىك جوعارى. وسى كورسەتكىشتى تومەندەتپەۋ ءۇشىن باسقارما قاجەتتى شارالاردى قولعا العان.

سولتۇستىكتە قانداي جۇمىس ورىندارى بارىن جانە وندا بارعاندا قانداي جەڭىلدىكتەردىڭ بەرىلەتىنىن بارلىق اۋدان- قالاداعى جۇمىسپەن قامتۋ ورتالىقتارى جۇرتشىلىققا حابارلاپ وتىر. ال، قونىس اۋدارىپ، جەڭىلدىككە قول جەتكىزۋگە بارلىق ازاماتتىڭ مۇمكىندىگى بار دەيدى ماماندار.