ءمينيستردىڭ ورىنباسارى قىزمەتىنە 22 جاستاعى جىگىت تاعايىندالدى
11:51, 03 - شىلدە 2017
استانا. قازاقپارات - وزبەكستان پرەزيدەنتى شاۆكات ميرزيەيەۆ 22 جاستاعى الىشەر سادۋللايەۆتى حالىقتىق ءبىلىم بەرۋ ءمينيسترىنىڭ ورىنباسارى قىزمەتىنە تاعايىندادى.
بۇل تۋرالى وزبەكستاندىق «كوممەرسانت» پورتالى حابارلادى.
سەلەكتورلىق جينالىس كەزىندە حالىقتىق ءبىلىم بەرۋ ءمينيسترى ۋلۋگبەك ينوياتوۆ ءوزىنىڭ سۋ جاڭا ورىنباسارىن ەلگە تانىستىردى.
جاس جىگىت «كامولوت» سەزى كەزىندە وزبەكستاندا شەت تىلدەرىن وقىتۋدى جەتىلدىرۋ بويىنشا ۇسىنىستارىن ايتىپ، شاۆكات ميرزيەيەۆتىڭ كوزىنە تۇسكەن. 30 -ماۋسىم كۇنى وتكەن سەزدتە وزبەكستان پرەزيدەنتى جاس ماماننىڭ بىلىكتىلىگىن اتاپ وتكەن.
ايتا كەتەيىك، الىشەر سادۋللايەۆ 1994 -جىلدىڭ 11 -شىلدەسىندە دجيزاك وبلىسىنىڭ دجيزاك اۋدانىندا دۇنيەگە كەلگەن. ول تاشكەنتتەگى مەنەدجمەنتتى دامىتۋ سينگاپۋر ينستيتۋتىن (MDIST) بىتىرگەن. بۇعان دەيىن ول Result وقىتۋ ورتالىعىنىڭ ديرەكتورى قىزمەتىن اتقاردى.