اۋداندىق پوليتسيا بولىمىنەن الىنعان مالىمەتكە قاراعاندا، وقيعا 22 -ءساۋىر كۇنى تۇندە ورىن الدى. ساعات 22.00 دە كورشىلەس جانىبەك اۋدانى تۇرعىندارىنىڭ قوشانكول اۋىلدىق وكرۋگىنە قاراستى قاراسۋ قىستاعى ماڭىندا كيىك ءمۇيىزىن ساتقىسى كەلىپ جۇرگەندىگى جونىندە حابار تۇسكەن. قازتالوۆ جانە جالپاقتال پوليتسيا ءبولىمى قىزمەتكەرلەرىنەن جاساقتالعان ەكى جەدەل تەرگەۋ توبى وقيعا ورنىنا دەرەۋ جەتكەن. اتالعان جەردەن 23 -ءساۋىر كۇنى ساعات 00.30 دا ەكى اۆتوكولىك توقتاتىلدى. اۆتوكولىكتەگىلەر بوي تاسالاماق بولعانىمەن، پوليتسيا قىزمەتكەرلەرىنەن سىتىلىپ كەتە المادى. ولاردىڭ جانىبەك اۋدانى كۇيگەنكول اۋىلىنىڭ ءتورت تۇرعىنى ەكەندىگى بەلگىلى بولدى.
تەكسەرۋ كەزىندە قوس اۆتوكولىكتەن 227 دانا كيىك ءمۇيىزى تابىلدى. قازىرگى كەزدە كۇدىكتىلەرگە قاتىستى ق ر ق ك 339-بابى 2- ءبولىمى 2-تارماعىنا (الدىن الا ءسوز بايلاسىپ، ادامدار توبىمەن وسىمدىكتەردىڭ نەمەسە جانۋارلاردىڭ سيرەك كەزدەسەتىن جانە قۇرىپ كەتۋ قاۋپى تونگەن، سونداي- اق پايدالانۋعا تىيىم سالىنعان تۇرلەرىمەن، ولاردىڭ بولىكتەرىمەن نەمەسە دەريۆاتتارىمەن زاڭسىز اينالىسۋ) سايكەس قىلمىستىق ءىس قوزعالىپ، تەرگەۋ امالدارى جۇرگىزىلۋدە. ەسكە سالا كەتەيىك، بۇدان بۇرىن ب ق و- دا اۋىل تۇرعىنى كيىك مۇيىزدەرىمەن ۇستالعانىن جازعان بولاتىنبىز.