وڭىردە جۇمىس كۇشىنە قاجەتتىلىك جوق. سوندىقتان ق ر ۇكىمەتىنىڭ شەشىمىمەن ماڭعىستاۋ وبلىسىنا ۆيزالىق مەملەكەتتەردەن ەتنيكالىق قازاقتاردىڭ كوشىپ كەلۋىنە شەكتەۋ قويىلدى.
ءبىراق 17- شىلدەدەن باستاپ تۇركىمەنستاننان ماڭعىستاۋعا 827 قانداس كوشىپ كەلدى. سونىڭ ىشىندەگى ۆيزاسىندا كەلۋ ءوڭىرى رەتىندە اقمولا، پاۆلودار، اباي، شىعىس قازاقستان جانە سولتۇستىك قازاقستان وبلىستارى كورسەتىلگەن 724 ادامنىڭ 307 ءسى اتالعان ايماققا قونىس اۋداردى. ال 106 ادام جۇمىس توبىنىڭ شەشىمىمەن ماڭعىستاۋدا قالدى.
«الايدا تۇركىمەنستاننان كوشىپ كەلگەن 311 قانداس ءالى دە ماڭعىستاۋ وبلىسى اۋماعىندا ءجۇر. دەسە دە ولار قازىرگى كەزدە تىركەلە المايدى. تىركەلۋ ءۇشىن سولتۇستىك وڭىرلەرگە، ياعني ۆيزادا كورسەتىلگەن وڭىرلەرگە بارۋلارى قاجەت. جالپى، ۆيزانىڭ مەرزىمى بولادى. سول ۆيزادا كورسەتىلگەن مەرزىمدە ولار قازاقستان اۋماعىندا تىركەلمەگەن بولسا، ەلدەن شىعارىلادى»، - دەدى ماڭعىستاۋ وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسشىسىنىڭ ورىنباسارى دوسان جەتكىزگەن.
جالپى 1992-جىلدان باستاپ ماڭعىستاۋعا كورشىلەس ەلدەردەن 140 مىڭعا جۋىق ادام قونىس اۋدارعان.