ءار بالاعا - 21 مىڭ تەڭگە: وتىنىشتەر قاي كەزدە جانە قالاي قابىلدانادى
«ءبىز كەشە عانا سەلەكتور (بەينەبايلانىس ارقىلى وتكىزىلەتىن وتىرىس - اۆت.) وتكىزدىك. ءمينيستردىڭ تاپسىرىسى بار. قازىر اكىمدىك، «ازاماتتارعا ارنالعان ۇكىمەت» مەملەكەتتىك كورپوراتسيا، سوسىن ءبىزدىڭ جەرگىلىكتى دەپارتامەنتتەرىمىز جانە جۇمىسپەن قامتۋ ورتالىقتارى بار عوي. ولاردىڭ ءبارى وتىنىشتەردى قابىلدايدى»، - دەدى س. جاقىپوۆا قازاقپارات تىلشىسىنە بەرگەن سۇحباتىندا.
ونىڭ ايتۋىنشا، 1 -ساۋىردەن باستاپ ءوتىنىش بەرۋدىڭ قاجەتى جوق. سەبەبى الدىمەن زاڭ كۇشىنە ەنۋى كەرەك. سونىڭ نەگىزىندە ءمينيستردىڭ بىرنەشە بۇيرىعىنا قول قويىلادى. ءسويتىپ، اتالعان قۇجاتتار جەرگىلىكتى اتقارۋشى ورگاندارعا تۇسكەننەن كەيىن وتىنىشتەر قابىلدانا باستايدى. ءبىراق اتاۋلى الەۋمەتتىك كومەكتىڭ ءبارى 1 -ساۋىردەن باستاپ ەسەپتەلەدى.
«مەن ءوزىم بىرنەشە رەت ايتتىم، حالىققا 1 نەن باستاپ ءوتىنىش بەرىڭىزدەر دەپ ايتۋعا بولمايدى. سەبەبى زاڭ ەندى عانا قابىلدانادى. اتالعان قۇجات 28 -ناۋرىزدا سەناتتىڭ كەڭەيتىلگەن وتىرىسىنا شىعارىلادى. ودان كەيىن سەنات ماقۇلاداپ قولداسا، ەلباسىنىڭ قول قويۋىنا جىبەرىلەدى. ال قازىرگى زاڭعا سايكەس، اتاۋلى الەۋمەتتىك كومەك ءوتىنىشتى بەرگەن كۇننەن ەمەس، بەرگەن ايدان باستاپ تاعايىندالادى. دەمەك، ازاماتتار 15 -ساۋىردە كەلە مە، 29 -ساۋىردە كەلە مە، ءبارىبىر اتاۋلى الەۋمەتتىك كومەك ولارعا 1 -ساۋىردەن باستاپ تاعايىندالادى. وسى نورما ساقتالا بەرەدى»، - دەپ اتاپ كورسەتتى س. جاقىپوۆا.
ۆيتسە-ءمينيستردىڭ سوزىنە قاراعاندا، بۇگىندە ءمينيستردىڭ ارنايى بۇيرىقتارى دايىن تۇر. زاڭ قابىلدانسا، اتالعان قۇجاتتار بىردەن ق ر ادىلەت مينيسترلىگىنىڭ تىركەۋىنەن وتەدى. ءسويتىپ، بارلىق جەرگىلىكتى اتقارۋشى ورگاندارعا تاراتىلادى. سونىڭ نەگىزىندە وتىنىشتەر قابىلدانادى. «سوندىقتان 1 -ساۋىردەن بارىپ، ءوتىنىشتى قابىلداۋدى تالاپ ەتسە دە، جەرگىلىكتى اتقارۋشى ورگاندار ونى قابىلداي المايدى. ولاردىڭ بارلىعى بۇيرىقتى كۇتەدى. ەلباسى زاڭعا قول قويدى ما، ەرتەسىندە بىردەن بۇيرىق تىركەۋدەن ءوتۋى كەرەك. ءبىز ءبارىن دايىنداپ قويدىق. جەرگىلىكتى اتقارۋشى ورگاندار دا بىردەن حابارىن بەرەدى»، - دەيدى س. جاقىپوۆا.
ايتا كەتەيىك، Nur Otan پارتياسىنىڭ XVIII سەزىندە ق ر تۇڭعىش پرەزيدەنتى - ەلباسى نۇرسۇلتان نازاربايەۆ كوپبالالى وتباسىلاردا ءاربىر بالانىڭ تولەماقىسىن 21 مىڭ تەڭگەگە دەيىن ارتتىرۋدى تاپسىردى.
«ۇكىمەتكە الەۋمەتتىك جاعىنان از قامتىلعان ازاماتتاردى، اسىرەسە، كوپبالالى وتباسىلاردى قولداۋ شارالارىن كەڭەيتۋدى تاپسىرامىن. اتالعان كورسەتكىشتى كۇنكورىس دەڭگەيىنىڭ 70 پايىزىنا دەيىن جەتكىزۋىمىز كەرەك. ال اتاۋلى كومەك الىپ وتىرعان كوپبالالى وتباسىلاردىڭ ءاربىر بالاسىنا بەرىلەتىن جاردەماقىنى 21 مىڭ تەڭگەگە دەيىن ءوسىرۋدى تاپسىرامىن. اتالعان كومەكتى بارىنشا جەڭىلدەتۋ كەرەك. حالىق ارى-بەرى شاپقىلاپ جۇرمەسىن. سوسىن ونداي وتباسىلاردىڭ تابىسىن ەسەپتەگەندە باسقا الەۋمەتتىك جاردەماقىلاردى ساناۋدى الىپ تاستاۋ قاجەت. ايتپەسە، سونىڭ ءبارىن ساناعاندا كوپبالالى وتباسىلار جاعداي جاقسى ازاماتتار بولىپ شىعا كەلەدى»، - دەدى ن. نازاربايەۆ. وسىدان كەيىن ەلباسى اتالعان شارالاردى 1 -ساۋىردەن باستاۋدى مىندەتتەدى.
ق ر ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ بالالارعا بەرىلەتىن 21 مىڭ تەڭگەدەن بولەك اتا-اناسىنا دا قوسىمشا اقى تولەنەتىنىن جەتكىزدى. بۇگىندە ەلىمىزدە كۇنكورىستىڭ مينيمۋمى 29698 تەڭگەنى قۇرايدى. وسى ۋاقىتقا دەيىن اتاۋلى كومەكتى ءبىر ادامعا شاققاندا كۇنكورىس دەڭگەيىنىڭ 50 پايىزىنان، ياعني 14849 تەڭگەدەن اسپايتىن وتباسىلار السا، ەندى پرەزيدەنتتىڭ تاپسىرماسى بويىنشا اتالعان كورسەتكىش 70 پايىزىنان - 20789 تەڭگەگە دەيىن كوتەرىلىپ وتىر. دەمەك، كوپبالالى وتباسىنىڭ جالپى تابىسىن ءاربىر ادامعا بولگەندە اقشانىڭ سوماسى كۇنكورىس دەڭگەيىنىڭ 70 پايىزعا، ياعني 20789 تەڭگەگە جەتپەسە، ءاربىر بالاعا 21 مىڭ تەڭگەنىڭ جاردەماقىسى بەرىلەدى.
«سوسىن ەگەر جانۇيانىڭ ءاربىر ادامىنا شاققاندا تابىس كۇنكورىس دەڭگەيىنەن (70 پايىزدان- اۆت. ) تومەن بولسا، ايىرماشىلىق 10 مىڭ تەڭگە بولا ما، 7 مىڭ تەڭگە بولا ما، سول اتا- اناسىنا دا قوسىمشا تولەنەدى. ودان كەيىنگى ەڭ ۇلكەن جەڭىلدىك، بۇرىن تابىستى ەسەپتەگەندە «التىن القا»، «كۇمىس القا»، كوپ بالاعا بەرىلەتىن جاردەماقى، مۇگەدەكتەردىڭ جاردەماقىسى مەن ستيپەندياسى سانالاتىن. ەندى، سونىڭ ءبارىن ەسەپكە المايدى»، - دەيدى ب. ساپاربايەۆ.
بۇعان دەيىن قازاقپارات ءتىلشىسى اتالعان جاردەماقىنى تاعايىنداۋدىڭ ءتارتىبىن ساراپتاپ شىققان بولاتىن.