فۋتبولدان 21- الەم چەمپيوناتىنىڭ رەسمي اشىلۋى باستالدى
تانىمال ءانشى روببي ۋيليامس پەن رەسەيلىك ايدا گاريفۋللينا ورىنداعان تاماشا انمەن باستالعان سالتاناتتى شارانى «Qazaqstan» تەلەارناسى تىكەلەي ەفيردەن تاراتۋدا، دەپ حابارلايدى قازاقپارات ءتىلشىسى.
بۇعان دەيىن حابارلانعانىمىزداي، شاراعا FIFA پرەزيدەنتى دجانني ينفانتينو، رەسەي باسشىسى ۆلاديمير پۋتين، قازاقستان پرەزيدەنتى نۇرسۇلتان نازاربايەۆ پەن وزگە دە بىرنەشە مەملەكەتتىڭ باسشىلارى قاتىساتىنى كۇتىلۋدە.
الەمدىك كىل مىقتى كوماندالاردىڭ كەزدەسۋى 14 -ماۋسىم - 15 -شىلدە ارالىعىندا رەسەيدىڭ 11 قالاسىندا وتەدى. اتاپ ايتقاندا، ماسكەۋ، سانكت- پەتەربۋرگ، قازان، سوچي، ۆولگوگراد، ەكاتەرينبۋرگ، كالينينگراد، نيجني نوۆگورود، دونداعى روستوۆ، سامارا جانە سارانسك. چەمپيوناتقا الەمنىڭ 32 ۇزدىك ۇلتتىق قۇرامالارى قاتىسادى.
ەستەرىڭىزگە سالا كەتسەك، رەسەي ءوز تاريحىندا تۇڭعىش رەت الەم چەمپيوناتىن ۇيىمداستىرۋ مۇمكىندىگىنە يە بولدى. قازاقستاندىقتار FIFA- 2018 ويىندارىنىڭ اشىلۋ سالتاناتىنان بولەك، چەمپيوناتتىڭ رەسەي مەن ساۋد ارابياسى اراسىنداعى (استانا ۋاقىتىمەن 21.00) العاشقى ماتچىن دا «Qazaqstan» تەلەارناسىنان تىكەلەي كورە الادى.
الەمدىك دودا اياسىندا وتەتىن 60-تان استام ماتچتى «Qazaqstan» مەن «Qazsport» ارنالارى تۇگەلدەي تىكەلەي ەفيردەن كورسەتەتىن بولادى.
ايتا كەتەرلىگى، فۋتبولدان الەم چەمپيوناتىنىڭ 1/8 فينالى 30 -ماۋسىم كۇنى، ال قازاقستاندىقتار استانا كۇنىن تويلاپ جاتاتىن 6 -شىلدە كۇنى - شيرەك فينال باستالادى. جارتىلاي فينال 10- جانە 11- شىلدە كۇندەرى، فينال 15 -شىلدە كۇنى وتەدى.
فوتو: ru.fifa.com