قازاقتىڭ ۇلى تۇلعالارى 21 -عاسىردا ءومىر سۇرسە قانداي بولار ەدى؟ - فوتو
ەرەكشەلىگى سول اۆتور اۆگۋست كيد اباي قۇنانباي ۇلى، شاكارىم قۇدايبەردى ۇلى، ىبىراي التىنسارين، احمەت بايتۇرسىنوۆ، ساكەن سەيفۋللين، ماعجان جۇمابايەۆ، مۇحتار اۋەزوۆ سىندى مارقاسقا تۇلعالاردىڭ ۇرپاققا ۇلاعات بولىپ، ۇلت جادىندا ماڭگى ساقتالعان سوزدەرىن ستيكەرگە سىيعىزىپ، سۋرەتتەگى وبرازىن ويناقى تۇسىرگەن.
مۇنى كورگەن جەلى قولدانۋشىلارى جاپپاي جىلى لەبىزىن ءبىلدىرىپ، ءارىسى ءازىل-قالجىڭعا دا اينالدىرىپ جاتىر. جاقسىلاردىڭ ءسوزىن جەتكىزۋدىڭ ۇتىمدى جولىن تاپقان اۆتوردى ىزدەپ تاۋىپ، از-كەم تىلدەستىك.
اۆگۋست كيد ەسىمىمەن تىركەلگەن جەلى قولدانۋشىسى اقتاۋلىق بەكزات يسامبەرگەنوۆ بولىپ شىقتى.
- بەكزات، الدىمەن ءوزىڭىزدى تانىستىرساڭىز؟ اۆگۋست كيد دەگەن لاقاپ اتىڭىزىڭ ءوزى ەرەكشە ەكەن. جەلىنى جارعان جۇمىستارىڭىزعا سودان كەيىن توقتالايىق...
- 1995 -جىلدىڭ 1-ساۋىرىندە اقتاۋدا دۇنيەگە كەلدىم. تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ كوللەدجىن ءتامامداعانمىن. ماماندىعىم مۋلتيپليكاتور- ديزاينەر. ال لاقاپ اتىما كەلسەك، اۆگۋست دەگەن ەسىمنىڭ ەستىلۋى، ايتىلۋى وزىمە ۇنايدى. كيد (Kid) اعىلشىن تىلىنەن اۋدارعاندا «بالا» دەگەن سوزگە سايادى. بۇل ەشقاشان ەسەيگىم كەلمەتىندىگىنەن شىعار...
- جەلىدە اقىن- جازۋشىلار مەن قوعام قايراتكەرلەرىنىڭ سۋرەتى مەن سوزىنەن زامانۋي ستيكەر جاساعان جەتى كارتيناڭىز كەڭ تارالىپ كەتتى. كوپشىلىكتىڭ قىزىعۋشىلىعىن تۋدىردى. بۇل وي قالاي كەلدى؟
- بۇل يدەيانى اعام جالعاس ەرتاي ۇسىنعان. قازاقتىڭ ۇلى جازۋشىلارى مەن اقىندارىن قىزىقتى كەيىپتە سالساڭشى دەگەن ەدى. مەن ونى زاماناۋي ۇلگىدە جاساۋدى ءجون كوردىم. جالپى، ءار جۇمىستى قازىرگى ۋاقىتتىڭ تالاپتارىنا ساي جاساۋعا تىرىسامىن. سەبەبى بۇگىنگى كۇن - عالامتوردىڭ ۇستەمدىك ەتكەن ۋاقىتى. بارلىعى مەسسەندجەرلەردە وتىرادى، بارىنە جاقسى تانىس. اقىن- جازۋشىلاردىڭ كوزىمىز ۇيرەنگەن بەينەسىن وزگەرتۋ تۋرالى وي كەلدى. «ەگەر عالامتورى بار بولسا كۇنى بۇگىن نە ىستەپ جۇرەر ەدى» دەگەن سۇراق تۋىندادى.
اباي قۇنانباي ۇلى
شاكەرىم قۇدايبەردى ۇلى
- بۇل ستيكەرلەر ارقىلى قانداي ويدى جەتكىزگىڭىز كەلدى؟
- اۋەلدە ماقساتىم جاي عانا ادامداردى قىزىقتىرۋ بولدى. Facebook قولدانۋشىلارىنىڭ كوڭىلىن ءبىر سەرگىتەيىن دەدىم. جانە Telegram مەسسەندجەرىنە ستيكەر جاساعىم كەلگەن. Facebook-تاعى دوستارىمنىڭ رەاكسياسىن كورگىم كەلدى.
ىبىراي التىنسارين
احمەت بايتۇرسىن ۇلى
ساكەن سەيفۋللين
- ەلدىڭ رەاكسياسى كۇتكەنىڭىزدەن دە اسىپ تۇسكەن سياقتى. جەلىدەن بولەك، بىرنەشە سايت سالىپ تا ۇلگەردى. وسى جۇمىستاردىڭ جالعاسىن سالۋ، تاقىرىپ اياسىن كەڭەيتۋ جوسپاردا بار بولار؟ ويدا جۇرگەن قانداي شىعارماشىلىق قيالدارىڭىزدى جۇزەگە اسىرعىڭىز كەلەدى؟
- ءيا، بارلىعىنا ۇناپ جاتىر. ەڭبەگىم نازاردان تىس قالماعانىنا قۋانىشتىمىن. قازىر ءبىرىنشى مىندەت - ديزاين باعىتىندا جۇمىس ىستەۋ. ارمان كوپ. بولاشاقتا مۋلتفيلمدەر تۇسىرگىم كەلەدى. ول ەندى بولاشاقتىڭ ەنشىسىندەگى جۇمىس.
ماعجان جۇمابايەۆ
مۇحتار اۋەزوۆ
- قازىر نەمەن شۇعىلداناسىز؟ قايدا جۇمىس ىستەيسىز؟ انكەتاڭىزدا «قازاق فيلم» كورسەتىلىپتى؟
- قازىر الماتىدا تۇرامىن. سوڭعى جارتى جىلدا جارناما اگەنتتىگىندە جۇمىس ىستەپ ءجۇرمىن. وعان دەيىن فريلانسەر بولعانمىن. بىرنەشە جىل بۇرىن قازاق فيلم ستۋدياسىندا «تاستۇلەك»، «ءۇش سىيلىق»، «سيقىرلى كىتاپتار» اتتى قىسقا مەتراجدى جوبالاردا انيماتور بولىپ جۇمىس ىستەگەنمىن.
- راحمەت! شىعارماشىلىعىڭىز شىڭدالا بەرسىن!
اقبوتا كۇنتۋعان قىزى