پرەزيدەنتتىككە ۇمىتكەرلەر سانى 21 ادامعا جەتتى
بۇگىنگى كۇنى ۇمىتكەرلەر سانى 21 ادامعا جەتتى، دەپ ءمالىم ەتتى و س ك ءتوراعاسىنىڭ ورىنباسارى ۆلاديمير فوسس.
ونىڭ اتاپ وتۋىنشە، ۇمىتكەرلەردىڭ 18 ى سايلاۋعا ءوزىن- ءوزى، ەكى كانديداتتى، اتاپ ايتقاندا، ن. نازاربايەۆتى «نۇر وتان» پارتياسى، ال ت. سىزدىقوۆتى قازاقستاننىڭ كوممۋنيستىك حالىق پارتياسى ۇسىنعان. قازىرگى ۋاقىتتا ولاردىڭ سايلاۋ تالاپتارىنا سايكەستىگى تەكسەرىلىپ، كەيبىرى لينگيستيكالىق كوميسسياعا سىناق تاپسىرۋ ۇستىندە.
«8 كانديداتتى تىركەۋدەن باس تارتىلدى. ولاردىڭ 2 ەۋىنىڭ جاسى كونستيتۋتسياعا سايكەس سايلاۋعا ءتۇسۋ جاسىنا تولماعان. 6 اۋى لينگۆيستيكالىق كوميسسيا سىناعىن تاپسىرا المادى. 4 ادام لينگۆيستيكالىق كوميسسيا سىناعىن تاپسىردى. ولاردىڭ سايلاۋ تالاپتارىنا سايكەستىگى تەكسەرىلدى. ولار قازىرگى ۋاقىتتا سەنىمدى تۇلعالارىن تىركەپ، قول جيناۋ جۇمىسىمەن اينالىسۋدا»، - دەدى ۆ. فوسس.
ونىڭ اتاپ وتۋىنشە، بۇگىن م. تەلەبەكوۆ، ءا. قۇسايىنوۆ، س. مۇقاش جانە اسىلبەك امانتاي ورتالىق سايلاۋ كوميسسياسىنا كەلىپ، پرەزيدەنتتىككە ۇمىتكەر رەتىندە تىركەلگەن.
اۆتور: مارلان جيەمباي