ساپۋرا ەرجانوۆا 14 بالانى اسىراپ الىپ، ءوزىنىڭ تۋعان 7 بالاسىمەن قوسقاندا 21 بالانى تاربيەلەپ وسىرگەن جالعىز باستى انا. قازىرگى تاڭدا تاراز قالاسىندا تۇرادى. باتىر اناعا ءتان قاسيەتتەرىمەن تانىلعان ساپۋرا ەرجانوۆانىڭ بالا تاربيەسىندەگى ۇستانىمى جانە ومىرلىك قاعيداسى تۋرالى سۇحباتتاسقان ەدىك.
- ساپۋرا حانىم، بالا اسىراپ الۋ تۋرالى وي قايدان كەلدى؟
- مەن ورال قالاسىندا كوپبالالى وتباسىندا تۋىپ- ءوستىم. ۇيىمىزدە 14 بالا بولدى. ونىڭ 3-ەۋى قىز، 11 ى ەر بالا. مەن وتباسىمىزدىڭ تۇڭعىشى بولدىم. اكەم ءاردايىم جەتىمدەرگە، جەسىرلەرگە كومەكتەسىپ، قول ۇشىن بەرىپ جۇرەتىن جان ەدى. اكەمنىڭ ءدال وسى قاسيەتى مەنىڭ دە بويىما دارىعان دەپ ويلايمىن. اكەمنىڭ ادامدارعا دەگەن قامقورلىعىن، جاقسىلىعىن كورىپ وسكەن سوڭ، مەنىڭ دە جاقسىلىققا جانىم قۇمار بولدى.
- بالالارىڭىز تۋرالى ايتىپ بەرسەڭىز.. .
- مەن ورال قالاسىنداعى پەدينستيتۋتتا وقىپ، باستاۋىش ءپانى مۇعالىمى ماماندىعى بويىنشا ءتامامدادىم. كەيىن اقتوبە قالاسىندا مۇعالىم بولىپ جۇمىس ىستەدىم. سول قالادا جولداسىمدى كەزدەستىرىپ، وتباسىن قۇردىق. جولداسىم دا مۇعالىم ەدى. اقتوبەدە تۇرعانىمىزدا 6 بالامىز بولدى. اتا-ەنەم قايتىس بولعان سوڭ، تۋىستارىمىزعا جاقىن بولۋ ءۇشىن تارازعا كوشتىك.
«تارازدان بىرنەشە شاقىرىم جەردەگى ءشولدالا دەگەن اۋىلدا ءۇي سالىپ جاتىر، سوندا جۇمىس ىستەگەندەرگە ءۇي بەرەدى» دەگەندى ەستىپ باردىق. ءبىراز ۋاقىت وسىندا جۇمىس ىستەپ ءشولدالادان 4 بولمەلى پاتەردىڭ كىلتىن الدىق. 1988 -جىلى تارازدا «لەنين» اتىنداعى بالالار ءۇيى بولاتىن. بۇل قازاقستانداعى العاشقى بالالار ءۇيىنىڭ ءبىرى. سودان كەيىن شىمكەنت، الماتى جانە باسقا قالالاردا اشىلعان ەدى. باستاپقىدا بالالار ۇيىنەن 4 بالانى اسىراپ الدىق. ول كەزدە ولاردىڭ ەڭ ۇلكەنى 3,5 جاستا، كىشىسى 8 ايلىق ەگىز قىزدار بولدى. ال ورتانشىسى 1 جاسار ۇل بالا بولاتىن.
سول كەزدەرى كەڭەس ۇكىمەتى قۇلاپ، قازاقستان ەندى اياعىنان نىق تۇرىپ جاتقان شاق ەدى. ءبىز سەكىلدى ول كەزدەگى حالىقتىڭ بارلىعى قيىندىق كوردى.
1993 -جىلى جولداسىمنان ايىرىلىپ قالدىم. ول كەزدە جاسىم 44-تە بولاتىن. بالالار مەكتەپكە بارا الماي، اۋىلعا قاتىنايتىن جالعىز اۆتوبۋس توقتاپ قالعان سوڭ قالاعا كوشتىك. قالادا دا جاعداي ءماز بولمادى. ءسويتىپ، جۇرگەندە بالالار ۇيىنەن «بالالارعا وپەكۋن بولاسىن با؟» دەگەن ۇسىنىس ءتۇستى. ول كەزدەگى بالالار ۇيىندە جاعداي بولمادى. سۋ، جارىق، ءتىپتى جىلۋ بولعان جوق، بالالارعا قاجەتتى جاعداي جاسالمادى. سوندىقتان كوپ ويلانباي 1999 -جىلى تاعى 4 كىشكەنتاي بالانى اسىراپ الدىم. ولاردىڭ ەكەۋىنىڭ دەنساۋلىعىندا ماسەلەسى بولعان ەدى. اراعا ءبىر جىل سالىپ 2000 -جىلى اناسىنان ايىرىلعان 2 جەتىم بالانى باۋىرىما باستىم. ول كەزدە بىرەۋىنىڭ جاسى 11-دە، ەكىنشىسى 13 جاستا بولدى. كەيىن تاعى 3 بالاعا وپەكۋن بولدىم. ەڭ سوڭعى رەت 2006 -جىلى 4 جاسار بالانى اسىراپ الدىم. ءسويتىپ، 7 ۇل، 7 قىزدى باۋىرىما باستىم. قازىرگى تاڭدا بارلىعىن قوسقاندا 21 بالام بار. بالارىمنىڭ ەڭ ۇلكەنى 54 جاستا، كەنجەسى 23 جاستا. كەنجە ۇلىمنان باسقاسىنىڭ بارلىعى وتباسى قۇرىپ، بالا تاربيەلەپ وتىر. شۇكىر، قازىر 56 نەمەرەم، 11 شوبەرەم بار.
- 21 بالا تاربيەلەپ وتىرعان باتىر انا رەتىندە سىزگە قانداي دا ءبىر كومەك، قولداۋ كورسەتىلدى مە؟
- كەڭەس ۇكىمەتى كەزىندە ارنايى ۇيىم بولدى. ولار ءبىزدى ءوز قامقورلىعىنا الىپ، باقىلاپ وتىراتىن. اپتا سايىن قاجەتتى ازىق- تۇلىكتى جەتكىزىپ بەرەتىن. ءار كولحوز، سوۆحوز سويعان مالدىڭ ەتىمەن بولىسەتىن. كەيىن مەرەكە قارساڭىندا بالالارعا تاتتىلەر بەرىپ وتىردى. قامقورلىق كۇندەرى اپتالىقتارىندا ارنايى مەكەمە، ۇيىمدار جينالىپ توڭازىتقىش سىيلاعانى ەسىمدە. دەگەنمەن، اۋىز تولتىرىپ ايتارلىقتاي كومەك بار دەي المايمىن.
- جاقىندا تاراز قالاسىندا وتكەن «مەرەيلى وتباسى - 2022» بايقاۋىنىڭ جەڭىمپازى اتاندىڭىزدار. وسىنداي بايقاۋلارعا ءجيى قاتىسىپ تۇراسىز با؟
- جوق، بۇعان دەيىن بايقاۋلارعا مۇلدە قاتىسىپ كورمەپپىن. تاراز قالاسىنىڭ اكىمشىلىگىنەن ۇسىنىس ءتۇسىپ «مەرەيلى وتباسى - 2022» بايقاۋىنا قاتىستىق. بايقاۋعا كوپشىلىككە ۇلگى بولىپ، ونەگە كورسەتىپ جۇرگەن ءار وتباسىدان 10 ادامنان قاتىستى. بۇل بايقاۋدا ومىرلىك ۇستانىمىمىز، جەتىستىگىمىزدىڭ ارقاسىندا جەڭىمپاز بولدىق دەپ ويلايمىن.
قازىرگى تاڭدا 38 جاستاعى ارتۋر دەگەن ۇلىم وسى مەنىڭ باستاعان ءىسىمدى جالعاستىرىپ، ءوزىنىڭ 7 بالاسىنىڭ ۇستىنە 4 بالا الىپ ءوسىرىپ وتىر. وسىنداي قامقورلىقپەن اينالىسىپ جۇرگەن ازاماتتار قوعامدا كەمدە كەم. سوندىقتان ولارعا ۇكىمەت تاراپىنان بولسىن، ۇيىمىدار مەن جەكە مەكەمەلەر تاراپىنان بولسىن قولداۋ مەن كومەك كورسەتىلۋ كەرەك دەپ ويلايمىن. سەبەبى، بۇنىڭ بارلىعى ءبىر ادامنىڭ ارقاسىنا كادىمگىدەي اۋىرتپاشىلىق پەن جۇك سالادى.
سۋرەتتەر كەيىپكەردىڭ جەكە مۇراعاتىنان
EL. KZ