پاكىستاندا اۆتوبۋس ورتەنىپ، 20 ادام قازا تاپتى

يسلاماباد. شينحۋا- قازاقپارات - پاكىستاننىڭ شىعىسىنداعى پەندجاب پروۆينتسياسى حافيزاباد اۋدانىندا كەشە جولاۋشىلار اۆتوبۋسى پيكاپپەن سوعىسىپ، ورتەنگەن.

سالدارىنان 20 ادام تىرىدەي جانىپ كەتتى، 15 تۇرعىن زارداپ شەكتى، دەپ حابارلايدى قازاقپارات شينحۋا اگەنتتىگىنە سىلتەمە جاساپ.

قۇتقارۋ قىزمەتىنىڭ سوزىنشە، اپات فەيسالاباد Toll Plaza اۆتوجولىندا تاڭەرتەڭ بولعان. اۆتوبۋس وتىن تاسىمالداپ بارا جاتقان پيكاپپەن سوعىسقان، سول سەبەپتى دە ءورت باستالدى.

اقپارات تۇسكەننەن كەيىن قۇتقارۋشىلار بىردەن وقيعا ورنىنا كەلىپ، زارداپ شەككەندەردى جەرگىلىكتى اۋرۋحاناعا جەتكىزدى، دەپ حابارلادى قۇتقارۋ قىزمەتى.

ولاردىڭ كەيبىرىنىڭ دەنەسىن كۇيىك شالعان، ۇشەۋىنىڭ جاعدايى وتە اۋىر، دەپ تولىقتىردى مەكەمە.

قۇتقارۋ قىزمەتىنىڭ مالىمەتىنشە، اۆتوبۋستا شامامەن 40 جولاۋشى بولعان.

دەرەكتەر بويىنشا، اۆتوبۋس ەلدىڭ وڭتۇستىگىندەگى كاراچي پورتتى قالاسىنان ەل استاناسى يسلامابادقا بارا جاتقان.