سىرتقى ىستەر مينيسترلىگىنىڭ مالىمەتىنشە، يۋنەسكو اتقارۋشى كەڭەسىنىڭ 215-سەسسياسىندا 20- مامىردى دۇنيەجۇزىلىك مەترولوگيا كۇنى دەپ جاريالاۋدى ماقۇلداۋ تۋرالى شەشىم قابىلداندى.
بۇل شەشىم كەڭەستىڭ كۇن تارتىبىنە قازاقستان مەن حالىقارالىق سالماق ولشەۋ بيۋروسى باستاماسىمەن ەنگىزىلدى.
اتقارۋشى كەڭەس بۇل تارماقتى جىل سايىن 20- مامىردا دۇنيەجۇزىلىك مەترولوگيا كۇنى دەپ جاريالاۋدى جوسپارلاپ وتىرعان باس كونفەرەنسيانىڭ 42-سەسسياسىنىڭ كۇن تارتىبىنە ەنگىزۋدى ۇسىندى.
وتىرىستا يۋنەسكو جانىنداعى ق ر تۇراقتى وكىلدىگى اتقارۋشى كەڭەستىڭ مۇشەلەرىنە قازاقستاندىق ۇسىنىستى قولداعانى ءۇشىن العىسىن ءبىلدىرىپ، الەمدىك مەترولوگيالىق قوعامداستىق مەترولوگيا سالاسىندا الەۋەتتى قۇرۋدىڭ حالىقارالىق ۇيلەستىرىلگەن باعدارلامالارى بويىنشا يۋنەسكومەن ىنتىماقتاستىقتى جالعاستىراتىنىن اتاپ ءوتتى.
1999-جىلى حالىقارالىق سالماق ولشەۋ كوميتەتى 20- مامىردى دۇنيەجۇزىلىك مەترولوگيا كۇنى رەتىندە اتاپ وتۋگە شەشىم قابىلدادى، ال دۇنيەجۇزىلىك مەترولوگيا كۇنىنىڭ العاشقى مەرەكەسى 2000-جىلى ءوتتى. سودان بەرى جىل سايىن حالىقارالىق سالماق ولشەۋ بيۋروسى جانە بۇكىل الەمدەگى ۇلتتىق مەترولوگيالىق ينستيتۋتتار مەن ايماقتىق مەترولوگيالىق ۇيىمداردىڭ قاتىسۋىمەن حالىقارالىق زاڭنامالىق مەترولوگيا ۇيىمى دۇنيەجۇزىلىك مەترولوگيا كۇنىن ۇيىمداستىرادى جانە اتاپ وتەدى.