ەرلان قارين: پرەزيدەنت سايلاۋىنىڭ 20-قاراشاعا بەلگىلەنۋى - جاڭا ەلەكتورالدى سيكلدىڭ باستاماسى
«پرەزيدەنت سايلاۋىن وتكىزۋ تۋرالى باستاما كەيىنگى ءۇش جىلداعى ساياسي جاڭعىرۋ باعىتىنا تولىققاندى ساي كەلەدى. كونستيتۋتسيالىق رەفورما بيلىك تارماقتارى اراسىنداعى ءوزارا قارىم-قاتىناستىڭ جاڭا، نەعۇرلىم تەڭدەستىرىلگەن ءتارتىبىن بەكىتتى. جاڭا ۇلگىنى ىسكە قوسۋ ءۇشىن مەملەكەتتىڭ پرەزيدەنت، پارلامەنت، ۇكىمەت، ءماسليحاتتار سياقتى شەشۋشى ينستيتۋتتارىن قوسا العاندا بۇكىل ساياسي جۇيەنى قايتا باستاۋ قاجەت»، - دەيدى مەملەكەتتىك كەڭەسشى.
سونداي-اق، بۇل رەتتە ساراپشىلار مەن ساياسات ماڭى ورتالارىندا الداعى ەلەكتورالدى ناۋقان تۋرالى پىكىرتالاس كوپتەن بەرى ءوربىپ كەلە جاتقانىنا نازار اۋدارادى. ساراپشىلاردىڭ ءبىرقاتارى مەرزىمىنەن بۇرىن سايلاۋ وتكىزۋ قاجەتتىگى تۋرالى كوكتەمدە ايتقانىنا توقتالادى.
«قازىرگى سايلاۋدىڭ ەرەكشەلىگى - الداعى سايلاۋ ناۋقانى كەستەسىنىڭ الدىن الا جاريا ەتىلۋىندە بولىپ وتىر. قاسىم-جومارت توقايەۆ پرەزيدەنت سايلاۋى تۋرالى ءتيىستى جارلىققا قول قويعاننان ءبىر اي بۇرىن قۇلاققاعىس ەتتى. ال بۇعان دەيىن مەرزىمىنەن بۇرىن وتكەن سايلاۋلاردىڭ بارلىعى ولاردىڭ كۇنى كورسەتىلگەن جارلىققا قول قويىلعان كۇنى ءمالىم بولىپ كەلگەن ەدى. بۇل ۋاقىت الداعى ناۋقاننىڭ قوعامدا كەڭىنەن تالقىلانۋىنا عانا ەمەس، الەۋەتتى قاتىسۋشىلاردى الدىن الا دايىنداۋعا دا جەتكىلىكتى بولدى. زاڭ بويىنشا سايلاۋ كۇنى بەلگىلەنگەننەن كەيىن ەكى اي ىشىندە وتەدى، ءبىراق ءىس جۇزىندە ناۋقان ءۇش ايعا سوزىلادى.
قوعامنىڭ بىرلىگى، مەملەكەتتىڭ تۇراقتىلىعى، ەلدىڭ كەز كەلگەن ىشكى جانە سىرتقى ماسەلەلەرگە دۇرىس جاۋاپ بەرە الۋ قابىلەتى تەك قانا تەڭدەستىرىلگەن جانە تۇراقتى ساياسي جۇيە جاعدايىندا عانا قامتاماسىز ەتىلەدى. سوندىقتان، گەوستراتەگيالىق تۋربۋلەنتتىك ۋشىعا تۇسكەن كەزدە الداعى پرەزيدەنت سايلاۋى ءبىزدىڭ ەلىمىزدى كەڭ كولەمدى الەۋمەتتىك-ەكونوميكالىق رەفورمالار دىڭ جاڭا كەزەڭى قارساڭىندا بىرىكتىرەتىن ەڭ ماڭىزدى فاكتورعا اينالۋى ءتيىس»، - دەيدى ەرلان قارين.