بۇل جايىندا ول Facebook پاراقشاسىندا جازدى.
«قۇرمەتتى دوستار! وتكەن اپتادا Nur Otan - نىڭ XXI تاريحي سەزىندە تۇڭعىش پرەزيدەنت - ەلباسى نۇرسۇلتان ءابىش ۇلى نازاربايەۆتىڭ باستاماسىمەن مەملەكەت باسشىسى قاسىم- جومارت كەمەل ۇلى توقايەۆ ءبىراۋىزدان پارتيا ءتوراعاسى بولىپ سايلاندى. ەلباسى ايتقانداي، «ءبىزدىڭ ەلىمىز جاھاندىق ترانسفورماتسيا، كۇردەلى جانە جاۋاپتى شەشىمدەر داۋىرىنە قادام باستى. ولاردىڭ تابىستى بولۋى ساياسي ەرىك- جىگەرگە، ايقىن ماقساتتارعا جانە ەڭ باستىسى، حالىقتىڭ قولداۋىنا بايلانىستى بولادى. بارلىق قاجەتتى رەسۋرستارعا يە Nur Otan پارتياسى مەملەكەت باسشىسىنىڭ باعىتىن ىسكە اسىرۋدا سەنىمدى كومەكشى بولۋعا ءتيىس».
سەزدە ەل پرەزيدەنتى، Nur Otan پارتياسىنىڭ جاڭادان سايلانعان ءتوراعاسى قاسىم- جومارت كەمەل ۇلى توقايەۆ پارتيانى رەفورمالاۋ، جۇمىستىڭ ادىستەرى مەن مازمۇنىن جاڭارتۋ، پارتيالىق باقىلاۋدى كۇشەيتۋ، قوعامدىق قابىلداۋلاردىڭ تيىمدىلىگىن ارتتىرۋ، كادرلىق الەۋەتتى نىعايتۋ، سونداي- اق جاڭا فورماتسياداعى ادامداردى تارتۋ جونىندە ناقتى مىندەتتەر قويدى» دەپ جازادى باۋىرجان بايبەك.
ونىڭ ايتۋىنشا، ەل پرەزيدەنتى بەلگىلەگەن جۇيەلى رەفورمالارعا كەڭ اۋقىمدى قوعامدىق- ساياسي قولداۋدى قامتاماسىز ەتۋ ءۇشىن بۇگىنگى كۇنى Nur Otan - دا قاجەتتىنىڭ بارلىعى، ياعني ادامدار، تاجىريبە، رەسۋرستار جانە ينفراقۇرىلىم بار. Nur Otan الدىنا جاڭا كوزقاراستار مەن تاسىلدەردى تالاپ ەتەتىن مۇلدە جاڭا مىندەتتەر قويىلدى. سوندىقتان مەن پارتيا ءتوراعاسى قاسىم- جومارت كەمەل ۇلى توقايەۆقا اتقارىپ وتىرعان قىزمەتىمنەن بوساتۋ تۋرالى ءتيىستى ءوتىنىش بەردىم. بۇگىن مەنىڭ ءوتىنىشىم قاناعاتتاندىرىلدى. مەن مەملەكەتتىك جانە پارتيالىق قىزمەتتە 20 جىلدان استام ەڭبەك ەتتىم: ەكى رەت، جالپى العاندا 6 جىلعا جۋىق - Nur Otan ءتوراعاسىنىڭ ءبىرىنشى ورىنباسارى، 3 جىلعا جۋىق - پرەزيدەنت اكىمشىلىگى باسشىسىنىڭ ورىنباسارى لاۋازىمدارىندا، 4 جىل الماتى قالاسىنىڭ اكىمى بولىپ جۇمىس ىستەدىم.
قانداي قىزمەت اتقارسام دا، قاي سالاعا جاۋاپتى بولسام دا، مەن ءارقاشان وتانىمىزدىڭ تاۋەلسىزدىگىن نىعايتۋعا، قوعامدا ىشكى ساياسي تۇراقتىلىق پەن كەلىسىمدى قامتاماسىز ەتۋگە، ەل ازاماتتارىنىڭ ءال- اۋقاتىن ارتتىرۋعا ءوزىمنىڭ ۇلەسىمدى قوسۋعا تىرىستىم. ءوز جۇمىسىمدا اشىقتىق جانە جاۋاپكەرشىلىك قاعيدالارىن باسشىلىققا الدىم. ار- نامىس، سوزگە بەرىكتىك جانە ىسكە ادالدىق دەگەن ۇعىمدار مەن ءۇشىن ءارقاشان ءبىرىنشى ورىندا بولدى. بارلىق جۇمىستاردى اتقارۋدا ماعان زور سەنىم بىلدىرگەنى ءۇشىن تۇڭعىش پرەزيدەنت - ەلباسى نۇرسۇلتان ءابىش ۇلى نازاربايەۆقا ۇلكەن العىس بىلدىرگىم كەلەدى. مەملەكەت باسشىسى، Nur Otan پارتياسىنىڭ ءتوراعاسى قاسىم- جومارت كەمەل ۇلى توقايەۆقا وسى جىلدارى جان- جاقتى قولداۋ كورسەتكەنى ءۇشىن شىنايى العىس ايتامىن.
پارتيا اپپاراتىنىڭ قىزمەتكەرلەرىنە، سونداي- اق ورتالىقتاعى جانە جەرگىلىكتى جەرلەردەگى بارلىق پارتيا مۇشەلەرىنە ەرەكشە العىس بىلدىرەمىن. ولار - جاۋاپكەرشىلىكتى ءوز موينىنا الۋدان قورىقپايتىن ىسكەر جاندار، قازاقستاننىڭ بولاشاعى ءۇشىن كۇن سايىن قاجىرلى ەڭبەك ەتەتىن ناعىز پاتريوتتار. سىزدەرمەن بىرگە جۇمىس ىستەۋ مەن ءۇشىن ۇلكەن مارتەبە بولدى! ءسوز سوڭىندا ايتارىم، ەلىمىز ءۇشىن وسى تاعدىرشەشتى كەزەڭدە ءاربىر ازامات ءوزىنىڭ كوزقاراسى مەن سەنىمىنە قاراماستان مەملەكەت باسشىسىنىڭ اينالاسىنا توپتاسىپ، تاۋەلسىز قازاقستاننىڭ گۇلدەنۋى مەن ءبىزدىڭ بالالارىمىزدىڭ لايىقتى بولاشاعى ءۇشىن ماڭىزدى الەۋمەتتىك- ەكونوميكالىق جانە ساياسي رەفورمالار باعىتىن قولداۋى ءتيىس دەپ سانايمىن! Nur Otan بۇل جۇمىسقا ءوز ۇلەسىن قوسا الاتىنىنا كامىل سەنەمىن. قيىندىقتى ەڭسەرىپ، جەڭىسكە بىرگە جەتەمىز!» دەپ تۇيىندەدى ءسوزىن پارتيانىڭ بۇرىنعى باسشىسى.