بۇل تۋرالى ورتالىق سايلاۋ كوميسسياسىنىڭ وتىرىسىندا ق ر باس پروكۋرورىنىڭ ورىنباسارى بولات دەمبايەۆ ءمالىم ەتتى، دەپ حابارلايدى قازاقپارات ءتىلشىسى.
«پروكۋراتۋرا ورگاندارى سايلاۋ پروتسەسىنىڭ ءار كەزەڭىندە زاڭنامانىڭ ساقتالۋىنا قاداعالاۋ جۇرگىزدى. سايلاۋ كوميسسيالارى، مەملەكەتتىك ورگاندار تاراپىنان قانداي دا ءبىر زاڭ بۇزۋشىلىق تىركەلمەدى. قىلمىستىق قۇقىق بۇزۋ جاعدايلارى تىركەلمەدى. الايدا تالاپتاردى بۇزۋ وقيعالارى انىقتالعانىن ايتا كەتكەن ءجون. بۇقارالىق اقپارات قۇرالىندا سايلاۋ بويىنشا قوعامدىق پىكىرگە ساۋالناما جۇرگىزۋ شارتىن بۇزۋدىڭ ءبىر فاكتىسى، ۇگىت-ناسيحات ماتەريالىن ءبۇلدىرۋدىڭ ەكى فاكتىسى، زاڭسىز ۇگىت-ناسيحاتتىڭ 10 جاعدايى تىركەلدى. وسىلار بويىنشا پروكۋراتۋرا ورگاندارى اكىمشىلىك ءىس قوزعادى. بۇل تۇرعىدا 13 ادام جاۋاپكەرشىلىككە تارتىلدى»، - دەدى ب. دەمبايەۆ.
ونىڭ ايتۋىنشا، ۇگىت-ناسيحات ماتەريالىن بۇلدىرگەنى ءۇشىن ەلوردانىڭ ءبىر تۇرعىنى مەن اقتاۋ قالاسىنداعى ءبىر ادام 15 ا ە ك سوماسىندا ايىپپۇل تۇرىندە جازاعا تارتىلدى.
ب. دەمبايەۆ پروكۋراتۋرا ورگاندارىنا كەلىپ تۇسكەن وتىنىمدەر ەرەكشە قاداعالاۋدا ەكەنىن اتاپ ءوتتى.
«جالپى پروكۋراتۋرا ورگاندارىنا سايلاۋ بويىنشا 20 ءوتىنىش كەلىپ ءتۇستى. ولاردىڭ بارلىعى زاڭنامادا بەكىتىلگەن مەرزىمدە قارالدى. ازاماتتار كوبىنەسە سايلاۋ كوميسسياسى، ءماسليحاتتار مەن اكىمدىكتەر قۇزىرەتىندەگى ماسەلەلەر بويىنشا جۇگىنگەن. وسىعان بايلانىستى 10 ءوتىنىش ولارعا قايتا جولداندى، ال توعىزى بويىنشا تۇسىنىكتەمە بەرىلدى»، - دەدى ول.