پاۆلودار مۇراجايىندا اتاقتى كۇيشىلەردىڭ 20 عا جۋىق دومبىراسى ساقتاۋلى

پاۆلودار. قازاقپارات - قازاق ساز اسپابىنىڭ بىرەگەيى قۇدىرەتتى قارا دومبىرانىڭ ءبىر جارىم مىڭ جىلدىق تاريحى بار دەسەدى.

ۇلتىمىزدىڭ ءتول اسپابى جايىندا اڭىز اڭگىمەلەر دە كوپ. بىزگە اتا-بابالارىمىزدان مۇرا بولعان كۇيلەر قانشاما. ونىڭ ءاربىرىنىڭ ءوز زامانىنا ساي تاريحى بار. بۇنىڭ سول كۇيلەردى ورىنداعان دومبىراعا دا قاتىسى بولسا كەرەك. پاۆلوداردا اتاقتى ادامدارعا شابىت بەرگەن جيىرماعا جۋىق دومبىرا ءبىر جەرگە توپتاستىرىلعان، دەپ حابارلايدى قازاقپارات «حابار 24» تەلەارناسىنا سىلتەمە جاساپ.

بۇقار جىراۋ اتىنداعى ادەبيەت جانە ونەر مۋزەيىنىڭ قورىندا ەلىمىزگە تانىمال ونەر ساڭلاقتارى، اقىن-جازۋشىلاردىڭ دومبىرالارى ساقتالعان. ماسەلەن، مەيرام اسىلعازين، بايعابىل جىلقىبايەۆ، نۇتفوللا شاكەنوۆ، كاۋكەن كەنجەتايەۆ جانە مۇزافار الىمبايەۆتىڭ دومبىرالارى تۇر. مۋزەيدىڭ ىرگەسى 90-جىلدارى قالانعان، جادىگەرلەر وبلىس تۇرعىندارىنان جينالعان.

ولاردىڭ اراسىندا شىعۋ دەرەگى بەيمالىم كونە دومبىرا دا بار. اسپاپتىڭ ءپىشىنى موڭعوليانىڭ التاي تاۋلارىنداعى ۇڭگىر تاستان تابىلعان كونە اسپاپقا كەلەدى. ۇڭگىردەن تابىلعان دومبىرا بەسىنشى عاسىرعا تيەسىلى ەكەن. ونىڭ موينىندا رۋنا جازباسىنان اۋدارعاندا: «جۇپار كۇي اۋەنى ءبىزدى سۇيىسپەنشىلىككە بولەيدى» دەگەن جازۋ بار.

«وسى سوزدەردىڭ وزىنە قاراپ وتىرىپ دومبىرانىڭ قانشاما جىلدىق تاريحى بار ەكەنىن كورۋگە بولادى. دومبىرا قازاقتىڭ مۇڭىن، زارىن، سالت-داستۇرلەرىن، تاريحىن ساقتاپ، بىزگە جەتكىزىپ وتىرعان ۇلى اسپاپتاردىڭ ءبىرى»، - دەيدى بۇقار جىراۋ اتىنداعى ادەبيەت جانە ونەر مۋزەيىنىڭ عىلىمي قىزمەتكەرى ەربول قايىروۆ.