شاعىن نەسيەگە كوزدەلگەن 20 ميلليارد تەڭگە قالاي بولىنەدى؟
«اۋىلداردا كاسىپكەرلىكتى دامىتۋ ءۇشىن بۇل باستاما وتە ماڭىزدى. وسىعان وراي قوسىمشا بولىنگەن 20 ميلليارد تەڭگەنىڭ 14 ميلليارد تەڭگەسىن اۋىلدارعا نەسيە بەرۋگە، ونىڭ ىشىندە 10 ميلليارد تەڭگەنى اۋىل شاارۋاشىلىعى تاۋارلارىن ءوندىرۋشى كاسىپورىنداردىڭ اينالاسىندا يادرولىق كووپەراتسيالار جوباسىن دامىتۋعا جۇمساۋدى ۇسىنامىز. بۇل شاعىن نەسيە الاتىندارعا ءونىمنىڭ ساتىلۋىنا كەپىلدىك بەرۋدى قامتاماسىز ەتەدى. قالعان 6 ميلليارد تەڭگەنى قالالارعا جانە مونوقالالارعا باعىتتاۋ جوسپارلانىپ وتىر»، - دەدى مينيستر.
وسى رەتتە ول بولىنگەن قاراجاتتى ۋاقىتىندا يگەرۋ جانە جوسپارلاۋدى قامتاماسىز ەتۋ ءۇشىن رەسپۋبليكالىق باعدارلامالاردىڭ اكىمشىلەرى جەرگىلىكتى اتقارۋشى ورگاندارمەن بىرلەسىپ، وڭىرلەر بويىنشا ناقتى وتىنىمدەردى اعىمداعى جىلدىڭ 15- ناۋرىزىنا دەيىن قارجى مينيسترلىگىنە ەنگىزۋلەرى قاجەتتىگىن باسا ايتتى. بۇل ورايدا شاعىن نەسيەلەۋ باعدارلاماسىنىڭ اۋىلدا جانە شاعىن قالالارداعى اكىمشىسى اۋىل شارۋاشىلىعى مينيسترلىگى، ال قالالار مەن مونوقالالاردا ۇلتتىق ەكونوميكا مينيسترلىگى بولادى.
«قازىرگى تاڭدا شاعىن نەسيەلەۋدى دامىتۋ «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ» باعدارلاماسى اياسىندا ىسكە اسىرىلۋدا. بۇل باعىت جاپپاي كاسىپكەرلىكتى دامىتۋ بويىنشا ەڭ ءتيىمدى تەتىك بولىپ تابىلادى. 2018-جىلعا بەكىتىلگەن بيۋجەتتە شاعىن نەسيەلەۋ باعدارلاماسىنا 42 ميلليارد تەڭگە قارالعان. ونىڭ 31 ميلليارد تەڭگەسى اۋىلدىق جەرلەرگە، 11 ميلليارد تەڭگەسى قالالار مەن مونوقالالارعا باعىتتالماق. مەملەكەت باسشىسىنىڭ تاپسىرماسىمەن قارجىلاندىرۋ 20 ميلليارد تەڭگەگە ۇلعايىپ، اعىمداعى جىلى شامامەن 62 ميلليارد تەڭگەنى قۇرايدى»، - دەدى ءمادينا ءابىلقاسىموۆا.
ايتا كەتەرلىگى، ەڭبەك جانە حالىقتى الەۋمەتتىك قورعاۋ مينيسترلىگى ۇلتتىق ەكونوميكا، اۋىل شارۋاشىلىعى، قارجى مينيسترلىكتەرىمەن جانە جەرگىلىكتى اتقارۋشى ورگاندارمەن بىرلەسىپ، ەلباسىنىڭ شاعىن نەسيەنى كەڭەيتۋ جونىندەگى ءتورتىنشى الەۋمەتتىك باستاماسىن ىسكە اسىرۋدىڭ ناقتى تەتىگىن ازىرلەدى.
اۆتور: مارلان جيەمباي